बारामा नगरपालिका ३ कर्मचारी घुस रकम सहित पक्राउ

२४ असार, हेटौंडा। मंगलबार बारामा घुस रकम सहित नगरपालिकाका ३जना सरकारी कर्मचारी पक्राउ परेका छन।

अख्तियार टोलीले जिल्लाको पचरौता नगरपालिकाका ईन्जिनियर सहित ३ जनालाई घुसको रकम सहित  पक्राउ गरेको हो ।घुस रकम सहित पक्राउ पर्नेमा पचरौता नगरपालिका इन्जिनियर राम प्रकाश सतरा ,पचरौता नगरपालिकाका नायव सुब्बा बद्रीबहादुर थापा र कार्यालय सहयोगी धुव्र महतो रहेका छन्। इन्जिनियर सतरा र कार्यालय सहयोगी  धुव्र महतोले पचरौता नगरपालिकास्थित विद्यालयको कम्पाउण्ड वाल निर्माण सम्पन्न भए पश्चात नियमानुसार भुक्तानीका लागि सिफारिस गर्नुपर्नेमा सो नगरी विभिन्न बहाना गरी सेवाग्राहीसँग १५ हजार  घुस लिदै गर्दा र सुब्बा थापाले महिला सशक्तीकरणसम्बन्धी अनुशिक्षण तालिम कार्यक्रमको भुक्तानीका लागि सिफारिस गर्नुपर्नेमा सो नगरी विभिन्न बहाना गरी सेवाग्राहीसँग  १४ हजार घुस रकम लिदै गर्दा अख्तियार दुरूपयोग अनुसन्धान आयोगको कार्यालय, हेटौंडा, मकवानपुरबाट खटिई गएको टोलीले पक्राउ गरिएको आयोगमा प्रवक्ता प्रदिप कोइरालाले जानकारी दिएका छन्।

अख्तियारले घुसवापतको रकम सहित निजहरूकै कार्यालय परिसरबाट रङ्गेहात नियन्त्रणमा लिई अनुसन्धान भइरहेको प्रवक्ता कोइरालाले बताए।