देउरालीको पहिरो हटाइयो, फाखेल र सिस्नेरी अझै अवरुद्ध, लगातारको बर्षाले जनजिवन कष्टकर

२७ असार, हेटौंडा । हेटौँडाबाट काठमाडौँ जाने छोटो बाटो सिस्नेरी–फाखेल–हुमाने–काठमाडौं सडकखण्ड अन्तर्गत देउरालीमा झरेको पहिरो हटाइएको छ । 
विहिबार देखि परेको पानीका कारण ईन्द्रसरोवर गाउँपालिका वडा नम्बर २ देउराली भन्दा एक किलोमिटर तल झरेको पहिरो हटाइएपनि गाडी भने सुचारु हुन सकेको छैन । 
फाखेल र सिस्नेरीमा झरेको पहिरो अझै हटाउँन नसकिएका कारण बाटो सुचारु हुन नसकेको जिल्ला प्रहरी कार्यालय मकवानपुरका प्रहरी उपरीक्षक मुकेश कुमार सिंहले जानकारी दिए ।
बिहिबार राति देखि परेको पानीले लेदो माटोसहितको पहिरो खस्दा सडक अवरुद्ध भएको थियो । भिमफेदीका प्रहरी निरिक्षक सन्त लामाको नेतृत्वमा गएको प्रहरी टोलीको सकृयतामा पहिरो पन्छाइएको प्रहरी उपरिक्षक सिंहले जनाकारी दिए । यस्तै जिल्ला प्रहरी कार्यलय मकवानपुरका प्रहरी निरिक्षक सुरेन्द्र श्रेष्ठको टोली त्यस तर्फ परिचालन गरिसकिएको पनि प्रहरी उपरिक्षक सिंहले बताए ।
यता, निरन्तर परेको बर्षासंगै गएको पहिरोले गर्दा सोमबारदेखि अवरुद्ध कान्तिलोकपथ सुचारू हुन सकेको छैन ।
कान्तिलोकपथ अन्तर्गत  भिमफेदी गाउँपालिका ८ गगटे, कालोपहिरो भन्ने ठाउँमा सोमबार दिउँसो  पहिरो  र मंगलबार बिहान लेनडाडा सिमात खोला नजिकै ठुलो ढुङ्गा खस्दा राजपथ अबरुद्ध बनेको इलाका प्रहरी कार्यालय ठिङ्गनका प्रहरी निरीक्षक सागर विक्रम राणाले बताएका छन् ।
यस्तै लगातारको बर्षा पछि आएको बाढीले कुखरेनी खोलामा विहिबार मात्रै हालेको हुमपाइप बगाएको जिल्ला प्रहरी कार्यलय मकवानपुरले जनाएको छ ।
यसैगरी हेटौँडा ५ सनोपोखरा पिप्ले कुना क्षेत्र डुवानमा परेको छ । राप्ति र कर्रा खोलमा पानिको वहाव लगाता बढीरहेको छ । 
संभावित खतरालाई मध्यनजर गर्दै जिल्ला प्रहरी कार्यलय मकवानपुरले सुरक्षा टोलीलाई तैनाथ अवस्थामा राखिएको र केही टोलीलाई परिचालन समेत गरिसकिएको जिल्ला प्रहरी कार्यलय मकवानपुरका प्रहरी उपरिक्ष मुकेश कुमार सिंहले जानकारी दिए ।