बाढी पहिरोका कारण मकवानपुरमा मृत्यु हुनेको संख्या तीन 

२८ असार, हेटौँडा । विहिबार देखिको अबिरल बर्षाको कारण आएको बाढी र पहिरोका कारण मकवानपुरमा मात्रै मृत्यु हुनेको संख्या तीन पुगेको छ । 
मकवानपुरको थाहानगरपालिका–३ मा दम्की खोलाले बगाउँदा १४ बर्षीया स्कुले छात्राको मृत्युभएको छ । स्थानीय जनकल्याण मावीमा अध्ययनरत बालिका सन्तमाया बलामी स्कुलबाट घर फर्कनेक्रममा खोला तर्दा उनलाई खोलाले बगाएको जिल्ला प्रहरी कार्यालय मकवानपुरले जनाएको छ । 
यस्तै मकवानपुरको इन्द्रसरोबर २ मा शुक्रबार साँझ भेलले  बगाउँदा एक युवतिको मुत्यु  भएको छ । इन्द्रसरोबर २, हेचुलिमा १४ बर्षीया सुष्टी डिमडुङगलाइ घर नजिकै आएको भेलले  बगाएको प्रहरीले जनाएको छ ।
यसैगरी मकवानपुरको कैलाशगाउँपालिका १० मा शुक्रबार साँझ खोलामा आएको बाढीले बगाउँदा वेपत्ता भएका एक जना पुरुषको शव भेटिएको छ । कैलाश १० का अन्दाजी ५०÷५५ बर्षका सानु कान्छा सुनारलाई डुडु खोला तर्ने क्रममा खोलामा आएको बाढीले बगाएको थियो ।
अबीरल वर्षासंगै आएको बाढी पहीरोका कारण पुर्वपश्चिम राजमार्ग अबरुद्ध भएको छ । राजमार्गको चुरियामाई सडकखण्डमा पहीरो गएर सवारी आवागमनमा अवरोध पुगेको छ ।
यस्तै मनहरी ज्यामीरे सडक खण्डमा रुख ढलेर राजमार्ग रोकीएको छ । दुबै स्थलमा जनपथ र सशस्त्र प्रहरीको टोली परिचालन गरी राजमार्ग खुलाउने प्रयास भईरहेको मकवानपुरका प्रहरी उपरिक्षक मुकेश सिंहले जानकारी दिए ।
यस्तै छोटो दुरीमा चल्ने काठमाडौँ सिस्नेरी हेटौंडा सडक र काठमाडौँ फाखेल हेटौँडा सडक खण्डपनि पहिरोका कारण अवरुद्ध भएको जिल्ला प्रहरी कार्यालय मकवानपुरले जनाएको छ ।