प्रदेश ३ सरकारद्वारा बाढी पहिरो पिडितका लागी राहतको घोषणा 

२८ असार, हेटौँडा । बाढी, पहिरोका कारण मृतक र घाइते भएका परिवारलाई प्रदेश ३ सरकारले राहत रकमको घोषणा गरेको छ । 
समितिका अध्यक्ष समेत रहनुभएका मुख्यमन्त्री डोरमणि पौडेलको अध्यक्षतामा बसेको बैठकले राहत रकम दिने घोषणा गरेको हो ।
प्रदेश ३ को विपद् व्यावस्थापन निर्देशक समितिको शनिवार बसेको वैठकले बाढी, पहिरोका कारण मृत्यु भएकाका परिवारलाई प्रदेश सरकार मार्फत एकलाख रुपैयाँका दरले राहत रकम दिने घोषणा गरेको हो । 
हालसम्म प्रदेश ३ का १३ जिल्लामा बाढी पहिरोका कारण मृत्यु हुनेको संख्या ११ पुगेको प्रहरीको तथ्याङ्क छ ।
यसैगरी बाढी पहिरोमा परेर घाईते भएकाहरुका लागि प्रदेश ३ सरकार मातहत रहेका अस्पतालमा निशुल्क उपचार गर्ने र त्यस भन्दा बाहेकका अस्पतालमा उपचार गराएमा जनही २५ हजार रुपैयाँ सम्म राहत रकम उपलब्ध गराइने समितिका सदस्य आन्तिरिक मामिला तथा कानुन मन्त्री शालिकराम जमकट्टेलले जानकारी दिए । घाइतेहरुको उपचारमा बिलका आधारमा बढीमा २५ हजार रुपैयाँ सम्म उपलब्ध गराउने उनको भनाई छ ।
बैठकमा प्रदेश सांसद जुनेली श्रेष्ठ, जिल्ला समन्वय समिति मकवानपुरका प्रमुख रघुनाथ खुलाल तिनवटै सुरक्षा निकायका अधिकारी लगायतकाको सहभागिता रहेको थियो ।