बाढी पहिरोले मकवानपुरमा मात्रै ५ जनाको ज्यान लियो

३१ असार, हेटौँडा । गत विहिबारदेखिको अविरल बर्षाका कारण आएको बाढी पहिरोमा परी मकवानपुरमा मात्रै ५ जनाले ज्यान गुमाएका छन् ।
इन्द्रसरोवर गाउँपालिकाको मार्खुमा सोमबार थप दुईजनाको पहिरोमा परी मृत्यु भएपछि मकवानपुरमा मृतकको संख्या ५ पुगेको हो । 
मार्खुमा सोमबार घरमाथीबाट आएको पहिरोले घर पुरिदा घरभित्रै पुरिएका दुइजनाको शब निकालेपछि मृतकको संख्या ५ पुगेको हो । 
मृत्यु हुनेमा इन्द्रसरोवर गाउँपालिकाको मार्खुकी कान्छिमाया बलामी र उनकी छोरी बबिता बलामी रहेको प्रहरीले जनाएको छ । यस्तै घटनमा परी बुहारी बेलीमाया बलामी भने घाइते भएकी छिन । 
यसअघि विहिबारको बर्षाका कारण आएको बाढीले मकवानपुरको थाहानगरपालिका–३ मा दम्की खोलाले बगाउँदा १४ बर्षीया स्कुले छात्राको मृत्यु भएको थियो । स्थानीय जनकल्याण मावीमा अध्ययनरत बालिका सन्तमाया बलामी स्कुलबाट घर फर्कनेक्रममा खोला तर्दा उनलाई खोलाले बगाएको थियो । 
यस्तै मकवानपुरको इन्द्रसरोबर गाउँपालिका वडा नम्बर–२ मा शुक्रबार साँझ घर नजिकै आएको भेलले बगाउँदा १४ बर्षीया श्रृष्टी डिमडुङगको मृत्यु भएको थियो ।
यसैगरी मकवानपुरको कैलाशगाउँपालिका १० मा शुक्रबार साँझ खोला तर्ने क्रममा सोही स्थानका  सानु कान्छा सुनारलाई डुडु खोला बगाउँदा मृत्यु भएको थियो ।