इन्द्रसरोबरमा ओभर फ्लोबाट पानी पठाउने

मंगलबार विहान ७ः२० मा मापन गरिएको पानीको सतह

३१ असार, हेटौँडा । नेपालकै एक मात्रै मानव निर्मित जलाशय ईन्द्रसरोबरको ढोका खोल्ने सम्भावना टरेको छ । 
सोमबार विहान अप्रत्यासित रुपमा पानीको सतह बढेपछि ड्यामको ढोका खोलेर नियन्त्रित निकास गर्ने भनिएपनि दिउँसो पानी बढ्ने क्रम कम हुँदै गएपछि ड्यामको ढोका खोलिएको थिएन । ‘जलाधार क्षेत्रमा पानी पनि नपरेको र सतह बढ्ने क्रम पनि कम भएकाले ढोका खोल्नुपर्ने अवस्था अहिले छैन ।’–एक कर्मचारीले भने–‘यसरी नै बढ्यो भने ओभर फ्लोबाट पानी पठाउने तयारी छ ।’ 
अहिले जस्तै परिस्थिति सामान्य रहँदा ढोका खोल्नुपर्ने अवस्था नआउने उनको भनाई छ । आयोजना पनि संचालनमा रहेको र मौसम पनि अनुकुल हुँदा पानी बढ्ने क्रम घटिरहेको छ । सतह अप्रत्याशित बढेर ड्याममा क्षति नपुगोस् भनेर निगरानी भने जारी रहेको छ ।
ईन्द्रसरोबर जलायश भरिन अब ३ मिटर मात्रै बाँकी रहेको छ । सरोबरमा विहान ११ः२० मा पानीको सतह १५२६.९९ पुगेको छ । १५३० मिटर पानी भण्डारण गर्न सक्ने जलाशयको क्षमता छ । जलाशयमा विहान ७ः२० मा १५२६.९१ थियो । पछिल्लो ४ घण्टामा ०.०४ मिटर पानी बढेको हो । यसलाई हेर्ने हो भने जलाशयमा पानी बढ्ने गति निकै कम भएको छ । 
२०७१ साल असोज २५ गते पनि जलायशमा पानीको सतह १५२८ मिटर पुगेको थियो । त्यतिखेर ओभरफ्लोबाटै नियमित रुपमा पानी निकासा गराईएको थियो ।