पत्रकार धम्क्याउने रामप्रसाद प्रहरी हिरासतमा, प्रशासनबाट १० दिने म्याद

File Photo

१ साउन, हेटौँडा । मकवानपुरगढी मक्रान्चुलीका रामप्रसाद घिमिरेलाई प्रहरी हिरासतमा राखि अनुसन्धान गर्न जिल्ला प्रशासन कार्यालय मकवानपुरले १० दिने म्याद दिएको छ ।
समाचार लेखेको विषयमा पत्रकार बलराम पुडासैनीलाई फोनमार्फत गालिगलौज र ज्यान मार्ने धम्की दिएका उनलाई प्रहरीले बुधबार पक्राउ गरेको थियो । पक्राउ परेका उनलाई जिल्ला प्रशासन कार्यालयबाट अनुसन्धानका लागि १० दिनको म्याद थप गरेको मकवानपुर प्रहरीले जनाएको छ । 
घिमिरे अध्यक्ष रहेको उपभोक्ता समितिले मक्रान्चुलीमा केही दिन अघि निर्माण गरेको स्लाव ढलान भत्किएको समाचार तु खबर डटकममा पुडासैनीले लेखेका थिए । समाचारको विषयलाई लिएर उपभोक्ता समितिका अध्यक्ष घिमिरेले गालीगलौज गर्दै ज्यान मार्ने धम्की दिएपछि पुडासैनीले प्रहरीमा उजुरी दिएका थिए । 
ज्यानमार्ने धम्कीको घटनाप्रति नेपाल पत्रकार महासंघ मकवानपुर र प्रेस युनियन मकवानपुरले आपत्ति जनाउँदै दोषिलाई कारवाहीको माग गरेको थियो । मकवानपुरका नागरिक समाजका अगुवाहरुले राज्यको लगानी परेको काम गुणस्तरहिन हुनु र त्यस विषयमा समाचार लेख्नेलाई नै धम्क्याउनु गलत भएको भन्दै अख्तियार लगायतका निकायले यसबारे छानविन गर्नुपर्ने माग गरेका छन् । घिमिरेलाई जिल्ला प्रहरी कार्यालयको हिरासतमा राखिएको छ । घिमिरे सेवानिबृत्त सरकारी कर्मचारी हुन् ।