कांग्रेसले विपदबाट मृतक परिवारलाई २५ हजार राहत दिने

२ साउन, हेटौँडा । नेपाली कांग्रेस मकवानपुरले बाढीपहिरोमा परी ज्यान गुमाएकाका परिवारलाई २५/२५ हजार रुपैँया राहत उपलव्ध गराउने भएको छ ।
बिहिबार बसेको नियमित जिल्ला बैठकमा कांग्रेसले बाढिपहिरोमा परी मृत्यु भएका मकवानपुरका ५ जनाको परिवारलाई नगद २५ हजार रुपैँयाको दरले सहयोग गर्ने निर्णय गरेको हो । जिल्ला सभापति ईन्द्रबहादुर बानियाँको अध्यक्षतामा बसेको बैठकले घटनाप्रति दुःख व्यक्त गर्दै कांग्रेसले पीडित परिवारमा समवेदना व्यक्त गरेको छ । कांग्रेसले पीडित परिवारलाई तत्काल राहत उपलव्ध गराउन सरकारसंग माग समेत गरेको छ ।

जननायक वीपी कोईरालाको ३७ औं स्मृति दिवसको अवसरमा साताव्यापी कार्यक्रमहरु गर्ने भएको छ । स्मृति दिवसमा नेविसंघ मकवानपुरले साउन ४ गते पार्टी कार्यालयमा विहान ११ वजे विचार गोष्ठी गर्ने भएको छ भने कांग्रेस ३ नम्बर क्षेत्रीय समितिले साउन ५ गते विहान ८ बजे हेटौंडा अस्पतालका विरामीहरुलाई फलफुल वितरण गर्ने बैठकले निर्णय गरेको छ ।

त्यस्तै साउन ६ गते वीपी विचार समाजको आयोजनामा हेटौंडा–११ मा रहेको वीपी बाटिकामा विहान वृक्षारोपण र दिउँसो कांग्रेस मकवानपुर र वीपी फाउण्डेशन काठमाडौंको आयोजनामा मध्यान्ह १२ बजे विचार गोष्ठी र साउन ७ गते विहान ७ः३० बजे नेपाल तरुण दलले बुद्धचोकमा रक्तदान कार्यक्रम गर्ने कांग्रेस मकवानपुरको बैठकले निर्णय गरेको छ ।

बैठकले कांग्रेस मकवानपुरका जिल्ला सदस्य महेन्द्र राउतको पिता तथा कांग्रेस हेटौंडा १ का सचिव बमबहादुर राउतको असामयिक निधनप्रति शोक प्रस्ताव पारित गरेको छ ।