न्यायाधिश सरुवा : हेटौँडा को आए, को गए ?

२ साउन, हेटौँडा । न्याय परिषदले जिल्ला, उच्च र विशेष अदालतमा गरी २ सय ३६ न्यायाधीशको सरुवा गरेको छ । परिषदको बिहीबार बसेको बैठकले उच्च अदालतमा ७८ र जिल्ला अदालतमा १ सय ५६ जना न्यायाधीशको सरुवा गरेको हो । 
यसमध्ये हेटौँडामा रहेको पाटन उच्च अदालत हेटौँडा इजलास र मकवानपुर जिल्ला अदालतका न्यायाधिश पनि फेरिएका छन् । उच्च अदालत पाटन हेटौँडा इजलासमा दरबन्दी रही उच्च अदालत विराटनगरमा काजमा रहेका न्यायाधिश शिवराज अधिकारी उच्च अदालत दिपायल सरुवा भएका छन् । हेटौँडा इजलासमा दरबन्दी रहेका कृष्ण गिरीको उच्च अदालत सुर्खेत, हेटौँडामा दरबन्दी रही उच्च अदालत पाटनमा काजमा रहेका टेकप्रसाद ढुंगाना पाटनमै सरुवा भएका छन् । हेटौँडा इजलासमा दरबन्दी रहेका गोपाल भट्टराई उच्च अदालत जनकुरमा सरुवा भएका छन् ।
त्यस्तै, उच्च अदालत दिपायल दरबन्दी रही हेटौँडा इजलासमा काजमा रहेका चण्डीराज ढकालको हेटौँडा इजलासमै सरुवा भएका छन् । उच्च अदालत पाटनमा दरबन्दी रही उच्च अदालत विराटनगरमा काजमा रहेका रामप्रसाद अधिकारी, उच्च अदालत पाटनमा रहेका हरिप्रताप केसी, उच्च अदालत जनकपुर अस्थायी इजलास बीरगंजका बालमुकुन्द दवाडी र उच्च अदालत सुर्खेतमा रहेका नागेन्द्रलाल कर्ण हेटौँडा इजलासमा सरुवा भएका छन् । 
मकवानपुर जिल्ला अदालतका न्यायाधिश खडानन्द तिवारी बाँके जिल्ला अदालत, धु्रवकुमार पिया सर्लाही जिल्ला अदालत र स्विकृति पराजुली रामेछाप जिल्ला अदालत सरुवा भएका छन् । मकवानपुरमा भने भक्तपुर जिल्ला अदालत दरबन्दी रही सर्वोच्च अदालतमा काजमा रहेकी सीता शर्मा अधिकारी, दोलखा जिल्ला अदालतबाट कमलराज विष्ट र मोरङ जिल्ला अदालतबाट डिल्लीरत्न श्रेष्ठ आउने भएका छन् ।