यसरी भएको थियो प्रहरी र तस्करबीच फायरिङ, एक पक्राउ

५ साउन, हेटौँडा । मकवानपुर प्रहरी र गाँजा तस्करबीच आईतबार मध्यराति फायरिङ भएको छ । गाँजा लैजाँदै गरेको सूचनाको आधारमा पुगेको प्रहरी र गाँजातस्करबीच रजैयास्थित राप्तिखोला किनारमा फायरिङ भएको हो । 
आइतबार पत्रकार सम्मेलन गरी प्रहरीले राक्सिराङ गाउँपालिका वडा नम्बर ढुंगेनका ४३ बर्षीय कुमार स्यांतानलाई कटुवा पेस्तोल, गोली ५ थान र ३१ किलो गाँजासहित पक्राउ गरेको जनाएको छ ।
ईन्स्पेक्टर बुढाथोकी र तस्करबीच भएको फायरिङ विवरण
मिति २०७६।०४।०५ गते राति करिब १२ः२० बजेको समयमा जिल्ला मकवानपुर मनहरी गाउँपालिका वडा नम्बर ०९ रजैया राप्तिखोला स्थितमा राक्सिराङबाट पर्सा राष्ट्रिय निकुञ्ज  निस्कने खोलाको भित्री बाटो हुँदै पर्सा तर्फ लागु औषध गाँजा लैजाँदै गरेको भन्ने प्राप्त विशेष सुचनाको आधारमा यस जिल्ला प्रहरी कार्यालय मकवानपुरबाट प्रहरी निरीक्षक अनिश बुढाथोकीको कमाण्डमा टोलि खटी गई सम्भावित बाटोको खोचमा घेरा हाली एम्बुसिङ थापेको थियो । 
लागु औषध गाँजा  लाँदै गरेका ४/५ जनाको समुहले प्रहरीलाई देखी फायर खोलेकोमा प्रहरीको तर्फबाट आत्मसुरक्षाको लागी जवाफी फायर गरी उक्त समुह मध्येका  जिल्ला मकवानपुर राक्सिराङ गाउँपालिका वडा नम्बर १ ढुंगेन बस्ने बर्ष ४३ को कुमार स्याङतान भन्ने राजु स्याङतानलाई नियन्त्रणमा लिई निजको साथबाट कटुवा पेस्तोल थान १, सो भित्र लोड भई  फायर भएको खोका थान १, लाईभ राउन्ड थान ५ र लागु औषध गाँजा २ पोकामा ३१ किलो ४०० ग्राम सहित निजलाई पक्राउ गरी आवश्यक अनुसन्धान तथा कारवाही भईरहेको छ । 
स्यांतानलाई यसअघि २०७१ पुस १६ गते जिल्ला काठमाण्डौ किर्तीपुर नगरपालिका वडा नम्बर १६ लागु औषध नियन्त्रण ब्युरो काठमाण्डौले १०० किलो लागु औषध गाँजासहित पक्राउ गरी सजाय पाएको प्रहरीले जनाएको छ ।