बानियाँद्वारा बालकको उपचार र मन्दिर निर्माणमा सहयोग

५ साउन, हेटौँडा । विपि कोईरालाको ३७ औं स्मृति दिवसमा हेटौंडा अस्पतालमा फलफुल वितरण गर्न गएका नेपाली कांग्रेस मकवानपुरका सभापति इन्द्रबहादुर बानियाँले एक बालकको उपचारको लागि आर्थिक सहयोग गरेका छन् । 
भीमफेदी गाउँपालिका वडा नम्बर ३ बेसरघारीका १३ वर्षीय सुशन थोकरको उपचारमा बानियाँले सहयोग गरेका हुन् । थोकरको खुट्टा भाँचिएको र आर्थिक अवस्था कमजोर रहेका कारण उपचारमा कठिनाई भईरहेको बताएपछि नगद ५ हजार रुपैँया सहयोग गरेका छन् । बानियाँले अस्पतालका प्रमूख डा. प्रविण श्रेष्ठ र अस्पताल विकास समितिका अध्यक्ष प्रकाश पौडेललाई बालकको उपचारमा लाग्ने रकम मिनाह गरिदिन आग्रह गरेका थिए ।
यस्तै, कांग्रेस ३ नम्बर प्रदेश संसदीय दलका नेता समेत रहेका बानियाँले हेटौँडा–११ नवलपुरमा रहेको ताराकेस्वर महादेब मन्दिरको भौतिक संरचना निर्माणको लागि ५० हजार रुपैँया मन्दिर ब्यबस्थापन समितिका अध्यक्ष रामबहादुर श्रेष्ठलाई हस्तान्तरण गरेका छन् । उनले । मन्दिर निर्माणको लागि आवश्यक पर्ने श्रोतसाधन उपलब्ध गराउने प्रतिवद्धा समेत बानियाँले दिएका छन् । 
कार्यक्रममा कांग्रेस हेटोँडा उपनगर सभापति आनन्दराम पराजुली, उत्सव इटेनी लगायतका कांग्रेस नेता र स्थानीयको सहभागिता रहेको थियो ।