जनताले कम्युनिष्टको विकल्प खोज्न थाले : पौडेल

६ साउन, हेटौँडा । नेपाली कांग्रेसका बरिष्ठ नेता रामचन्द्र पौडेलले जनताले कम्युनष्टिको विकल्प खोज्न थालेको बताएका छन् ।
विपि स्मृति दिवसको अवसरमा सोमबार नेपाली कांग्रेस मकवानपुर र जननायक विपि कोइराला स्मृति ट्रष्ट काठमाडौंले हेटौँडामा गरेको विचार गोष्ठीमा बोल्दै नेता पौडेलले देशको विकास र समृद्धिको अपेक्षासहित जनताले कम्युनिष्टलाई दुईतिहाई नजिक मत दिएपनि वर्तमान सरकार त्यस विपरित लागेको बताए । वर्तमान सरकारले कुनै नयाँ काम गर्न नसकेको भन्दै उनले त्यस विपरित अहिले देशमा भ्रष्टाचार मौलाएको दावि गरे । उनले कम्युनिष्टप्रति विश्वास डग्मगाएकाले जनता विकल्पको खोजिमा रहेको बताए ।
उनले वर्तमान सरकार जनहितको काम गर्नुको सट्टा आफ्नो पक्षमा शक्ति सञ्चय गर्नमै व्यस्त रहेको बताए । कांग्रेसले आफ्ना आन्तरिक समस्यालाई समाधान गर्दै वर्तमान सरकारको गलत कार्यको प्रतिरोधमा उत्रनुपर्नेमा नेता पौडेलको जोड थियो ।
कार्यक्रममा केन्द्रीय सदस्य महालक्ष्मी उपाध्याय डिना, जिल्ला सभापति एवं ३ नम्बर प्रदेश संसदीय दलका नेता इन्द्रबहादुर बानियाँ, प्रदेशसभा सदस्य जीवन डंगोल, निवर्तमान जिल्ला सभापति रघुरमण न्यौपाने, प्रमुख सल्लाहकार माइकल रामचन्द्र अर्याल, जिल्ला सचिव बुद्ध लामा, सल्लाहकार उमा दाहाल, रिता खनाल, ट्रष्टका महासचिव रामचन्द्र पोख्रेल, नेपाल शिक्षक संघ मकवानपुरका अध्यक्ष रामकुमार अधिकारी, नेविसंघ जिल्ला अध्यक्ष राजु खतिवडा, जिल्ला प्रवक्ता प्रदिप कोइराला लगायतले मन्तव्य व्यक्त गरेका थिए ।
कार्यक्रममा प्राध्यापक डा. एकनारायण पौडेलले कार्यपत्र प्रस्तुत गरेका थिए । कार्यक्रम ट्रष्टका अध्यक्ष श्रीहर्ष कोइरालाको अध्यक्षतामा भएको थियो । कार्यक्रममा विभिन्न पार्टी परित्याग गरी १३ जनाले नेपाली कांग्रेसको सदस्यता लिएका थिए ।