८० हजार जनसंख्यालाई १ करोड १३ लाख लिटर पानी वितरण

६ पुस, हेटौँडा । हेटौँडा खानेपानी बोर्डले दैनिक १ करोड १३ लाख लिटर पानी वितरण गर्ने गरेको जनाएको छ । बोर्डले बुधबार आफ्नो प्रथम चौमासिक प्रगति विवरण सार्वजनिक गर्दै नगरका विभिन्न वडामा दैनिक सरदर १ करोड १३ लाख पानी वितरण गर्ने गरेको जनाएको हो । 
बोर्डले हेटौँडा वडा नम्बर १ देखि १० र  १६ देखि २१ मा बसोबार गर्ने ८० हजार जनसंख्यालाई १२ हजार ४ सय १० धाराबाट सरदर ६ देखि ७ घण्टा पानी वितरण गर्ने गरेको छ । बोर्डले सार्वजनिक गरेको साउनदेखि कार्तिकसम्मको विवरण अनुसार यो अवधिमा १ सय ९४ नयाँ धारा माग गरिएकोमा १ सय ९३ वटा जडान भएको छ, त्यसैगरी, ४२ वटा धारा नामसारी, १ सय ८४ पुराना धारामा मिटर जडान, ३ सय ५० मिटर मर्मत, २ सय ४७ मिटर वरपर सार्ने, २ सय ४७ वटा मेनलाईन लिकेज र मर्मत र १३ वटा होल चेन्ज गरिएको छ । साउनदेखि कार्तिकसम्ममा ८८५ मिटर नयाँ पाईपलाईन विस्तार, ५ सय ५० मिटर पुरानो जिर्ण पाईप परिवर्तन र ८ वटा छति धारो पत्ता लगानी ७२ हजार रुपैँया जरिवाना संकलन गरिएको छ । बोर्डका अनुसार अहिले मासिक सरदर ५१ लाख ८ हजार ६ सय ३ रुपैँया विलिङ हुने गरेको छ । 
प्रगति सार्वजनिक गर्दै अध्यक्ष प्रताप विष्टले नेपाल खानेपानी संस्थाबाट बोर्डमा हस्तान्तरण हुँदा ६६ लाख बक्यौता रहेकोमा सरकारी कार्यालय र विद्यालयहरुबाट अहिले ४ लाख रुपैँयामात्रै उठ्न बाँकी रहेको बताए । कम्प्युटर बिलिङ सिष्टम लागु भएपछि बोर्डप्रति विश्वास गरी ग्राहकले २७ लाख ७ हजार रुपैँया अग्रिम महसुल भुक्तानी गरेको उनले जानकारी दिए । 
बोर्डका निमित्ति कार्यकारी निर्देशक सुर्दशन ढकालका अनुसार प्रथम चौमासिकमा हेटौँडा–१६ मयुरधापमा जेनेरेटर घर निर्माण, सामरी सम्बवेल संरक्षणका लागि ग्याविन लगाउने, विभिन्न स्थानमा ८ सय ८५ मिटर लाईन विस्तार, हेटौँडा–८ र ९ मा ५ सय ५० मिटर जिर्ण पाईपलाईन विस्तारमा प्रगति हासिल गरेको बताए । उनका अनुसार यो अवधिमा हेटौँडा–७ र ५ मा डिप ट्युववेल निर्माण, विभिन्न क्षेत्रमा पुराना जिर्ण पाईप परिवर्तन, पानी परीक्षण प्रयोगशालाको स्तरोन्नति कार्य, भल्वहरुमा चेम्बर निर्माण, सहलगानीमा काम गर्न खानेपानी तथा सरसफाई डिभिजन कार्यालयमार्फत प्रक्रिया अघि बढाउने जस्ता काम भईरहेको छ । 
बोर्डले बुङदोडल, सामरी मुहान र कर्रा खोलमा मेन ट्रान्स्मिसन पाईप संरक्षण र हरिकुञ्ज पानी पोखरीमा पाले घर र कार्यलय कम्पाउण्ड मर्मत कार्य अघि बढाउने जनाएको छ ।