इन्द्रसरोबरका मृतक परिवारलाई कांग्रेसको ७५ हजार सहयोग

८ साउन, हेटौँडा ।  गत असारको अन्तिमको प्राकृतिक विपदमा परी मृत्यु भएका ईन्द्रसरोबर गाउँपालिकाका ३ परिवारलाई नेपाली कांग्रेस मकवानपुरले आर्थिक सहयोग गरेको छ । नेपाली कांग्रेस मकवानपुरले प्रति परिवार २५ हजार रुपैँयाका दरले सहयोग गर्ने निर्णय गरे अनुसार राहत रकम बुधबार ४ परिवारलाई ७५ हजार रुपैँया हस्तान्तरण गरेको हो ।
नेपाली कांग्रेसकी केन्द्रीय सदस्य महालक्ष्मी उपाध्याय डिनाले मृतक परिवारको घरमै पुगेर राहत रकम हस्तान्तरण गरेकी छिन् । उपाध्यायले गत असार ३० गते घरमाथिबाट आएको पहिरोमा पुरिएर मृत्यु भएका ईन्द्रसरोबर गाउँपालिका वडा नम्बर १ टौमाटकी आमा कान्छी रञ्जितकार र छोरी  बबिता बलामीको परिवारलाई ५० हजार रुपियाँ राहत हस्तान्तरण गरेकी छिन् । ईन्द्रसरोबर गाउँपालिका वडा नम्बर २ हासुलीमा पहिरोले पुरिएर मृत्यु भएकी १६ वर्षिया श्रृष्टि डिमडुङको परिवारलाई २५ हजार रुपैँया हस्तान्तरण गरिएको छ ।
कार्यक्रममा कांग्रेस २ नम्बर क्षेत्रीय सभापति यतिराज सापकोटा, हेटौंडा उपमहानगरपालिका सभापति आनन्दराम पराजुली, तरुण दल २ नम्बर क्षेत्रीय अध्यक्ष सुमन श्रेष्ठ, हेटौंडा–११ का सभापति विष्णु खनाल, महिला संघ ईन्द्रशरोबर संयोजक निर्मला रुम्बा, कांग्रेस मकवानपुरका सूचना प्रमूख सुजन विडारी, स्थानीय समाजसेवीहरु कुलबहादुर केवी, कृष्ण बलामी, अच्युत विष्ट, नबिना बलामी, राजकुमार घिसिङ, मंगलदाश गोले लगायतको उपस्थिति रहेको थियो ।
कांग्रेसले मंगलबार थाहा नगरपालिका वडा नम्बर ३ मा पनि मृतक परिवारलाई राहत उपलव्ध गराएको थियो ।
दिव्यताराबाट पनि सहयोग
ईन्द्रसरोबरका ३ जना मृतकको परिवारलाई दिव्यतारा सहकारी संस्था हेटौंडाले पनि राहतस्वरूप प्रतिपरिवार ५ हजारका दरले १५ हजार सहयोग गरेको छ । ईन्द्रशरोबर १ टौमाटकी २ मृतकलाई ईन्द्रसरोबर डुंगा ब्यवसायी संघले ४० हजार सहयोग गरेको छ भने ईन्द्रसरोबर वडा नम्बर १ का वडा अध्यक्ष एवं कांग्रेसका जिल्ला सदस्य जमानसिं वाईबाले ५ हजार सहयोग गरेका छन् । 
अविरल वर्षाका कारण ईन्द्रसरोबर गाउँपालिका वडा नम्बर १ मा ६२ घर पूर्ण क्षति र १ सय ७ घर आंशिक क्षति भएको वडा अध्यक्ष जमानसिं वाईबाले बताए । वडा अध्यक्ष वाईबाले पीडितहरुलाई तत्काल राहत सहयोग उपलब्ध गराउन सबैपक्षसंग आग्रह गरे ।