हेटौँडाका दृष्टिविहीनहरुको जनप्रतिनिधिसंग अभिमुखीकरण

१० साउन,हेटौँडा । हेटौँडाका दृष्टिविहीनहरुको जनप्रतिनिधिहरुसंग अभिमुखीकरण कार्यक्रम गरेका छन । कार्यक्रममा दृष्टिविहीनको अधिकार र आत्मनिर्भरताका लागि दृष्टिविहीन मैत्री स्थानीय शासनमा जोड दिइएको छ ।
शुक्रबार हेटौँडामा नेपाल नेत्रहीन संघको आयोजनामा भएको दृष्टिविहीन मैत्री स्थानीय शासन प्रणाली तथा अपाङ्गता समावेशीकरण सम्बन्धी जनप्रतिनिधिहरुका लागि आयोजित अभिमुखीकरण कार्यक्रममा दृष्टिविहीन मैत्री स्थानीय शासनमा जोड दिइएको हो ।
अपाङ्गता समस्या कि अवस्था भन्ने बारेमा स्पष्ट हुनु आवश्यक भएको बताउँदै हेटौँडा उपमहानगरपालिकाका जनप्रतिनिधिहरुले दृष्टिविहीन मैत्री स्थानीय शासनका लागि प्रतिबद्धता ब्यक्त गर्नु भएको थियो । कार्यक्रममा अपाङ्गता भएकाहरुका लागि सामाजिक विकासमा खर्च गर्न विनियोजन भएका बजेट विगतमा सडकलगायतका पूर्वाधार निर्माणमा खर्चने गरेको भन्दै दृष्टिविहीनले पाउने सेवा सुविधाको उपभोग गर्न स्थानीय तहका पदाधिकारीहरुको सहजीकरण आवश्यक भएको औल्याइएको थियो ।

नेत्रहीन संघका उपाध्यक्ष एवं प्रदेश ३ का अध्यक्ष सुरेशचन्द्र न्यौपानेको अध्यक्षतामा भएको कार्यक्रममा हेटौँडा उपमहानगरपालिकाका उपप्रमुख मीनाकुमारी लामा, हेटौँडा उपमहानगरपालिका वडा नम्बर १ का अध्यक्ष सविन न्यौपाने, वडा नम्बर ४ का वडा अध्यक्ष नवीन सिग्देल, वडा नम्बर ६ का अध्यक्ष अर्जुन चौलागाईँ, वडा नम्बर १९ का वडा अध्यक्ष नरनाथ सुवेदी, हेटौँडा उपमहानगरपालिका सामाजिक विकास महाशाखाका प्रमुख भीमप्रसाद तिमिल्सिना, नेत्रीहीन संघ मकवानपुरका अध्यक्ष तोरणबहादुर ओझाले दृष्टिविहीनहरुको आर्थिक सामाजिक विकास आवश्यक रहेको बताए । 
कार्यक्रममा नेत्रहीन संघका केन्द्रीय सल्लाहकार एवं शिक्षा, विज्ञान तथा प्रविधि मन्त्रालयका अधिकृत दीपक माझीले नेत्रहीनको अवस्था र दृष्टिविहीन मैत्री स्थानीय शासन प्रणालीका बारेमा कार्यपत्र प्रस्तुत गर्नु भएको थियो । 
कार्यक्रममा दृष्टिविहीन मैत्री स्थानीय शासन अनुगमन एवं योजना तर्जुमा गर्न उपमहानगरपालिकाका उपप्रमुख लामाको संयोजकत्वमा सात सदस्यीय समिति गठन गरिएको छ ।