टी–२० विश्वकप एसिया छनोटः नेपाल र कुवेत खेल्दै

११ साउन, हेटौँडा । सिंगापुरमा जारी आईसीसी टी २० विश्वकपको एसिया छनोटअन्तर्गत आज नेपाल र कुवेत विच खेल हुँदै छ । केहीबेरमा सुरु हुने कुवेतविरुद्धको खेलमा नेपालले टस जितेर फिल्डिङ रोजेको छ । 
शुक्रबार भएको खेलमा कुवेतले कतारलाई र सिंगापुरले मलेसियालाई हराएपछि नेपालको अन्तिम चरणमा पुग्ने सम्भावना बलियो भएको छ । आज नेपाल कुवेतविरुद्ध जितको लक्ष्यका साथ मैदानमा उत्रदै छ । 
नेपालका लागि अब सबै खेल गर या मरको अवस्थामा रहेका छन् । शनिबार कुवेतविरुद्ध हारेमा नेपालको विश्वकप खेल्ने सपना अधुरै रहनेछ । नेपालले अन्तिम खेलमा आइतबार नेपालले आयोजक सिंगापुरसित खेल्नेछ ।
ग्लोबल छनोटमा स्थान बनाउन नेपालले खेल्न बाँकी दुवै खेल जित्नुपर्नेछ । पाँच राष्ट्र सहभागी प्रतियोगितामा कतारसित पराजय व्यहोर्दा मलेसियालाई हराएको नेपालको २ अंकमात्र रहेको छ ।
नेपालले खेल्न बाँकी टिम सिंगापुर तीन खेलबाट ५ अंक बटुल्दै शीर्ष स्थानमा रहेको छ । त्यसैगरी, शनिबार खेल्दै गरेको टिम कुवेत तीन खेलबाट ३ अंकमा रहेको छ ।
शुक्रबार भएको खेलमा मलेसियालाई ८ विकेटले पराजित गर्दै सिंगापुर दोस्रो जितसहित शीर्ष स्थानमा पुगेको हो ।
तीन खेलमात्र खेल्न बाँकी रहँदा सिंगापुर, कुवेत र नेपालकोमात्र छनोटको सम्भावना रहेको छ भने मलेसिया र कतार बाहिरिइसकेका छन् ।