विस्थापितलाई बकैया–१० कार्यालयको सहयोग

११ साउन, हेटौँडा । बकैया गाउँपालिका वडा नम्बर १० का विस्थापित स्थानीयलाई वडा कार्यालयले सहयोग गरेको छ । असारको अन्तिम साताको अविरल बर्षाका कारण बाग्मति नदिमा आएको बाढिका कारण विस्थापित ७ परिवारलाई शनिबार कार्यालयले खाद्य सामग्री सहयोग गरेको हो । 
विस्थापित परिवारलाई प्रति परिवार ९० किलो चामल, १५ किलो दाल, ५ लिटर खाने तेल र २ किलो नुन वितरण वडा अध्यक्ष सोम तिमल्सिनाले बताए । ५० हजार रुपैँया बराबरको राहत सामग्री बकैयाका व्यवसायीहरु तुल्सीराम लामिछाने, मिठाराम दाहाल, दिपक लामा, चन्द्रकुमार राई, जय बकैया कन्स्ट्रक्सन र डिएलबी कन्स्ट्रक्सनले वडा कार्यालयलाई उपलव्ध गराएका थिए । 
वडा प्रतिनिधिहरुले विस्थापित बुद्धिमान भोम्जन, ज्योतिमाया भोलन, डिगमाया मोक्तान, सोनी थिङ, निमादोर्जे थिङ, नौसलीमाया नेगी र कुमार स्यांतानको परिवारलाई खाद्य सामग्री हस्तान्तरण गरेका थिए । विस्थापितहरु अहिले छिमेकीको घर, विद्यालयभवन र चर्च भवनमा आश्रमय लिएर बसेका छन् । बाढिका कारण ७ घरको पूर्ण रुपमा क्षति भएको छ भने लत्ताकपडा, अन्नपात लगायत सबै सामग्री बगाउँदा ३० लाख रुपैँया भन्दा बढिको नोक्सानी भएको प्रारम्भिक अनुमान छ ।
वडा कार्यालयले प्राकृतिक विपद्बाट भएको क्षतिको तथ्यांक समेत संकलन गरेको वडा अध्यक्ष तिमल्सिनाले जनाए । बाग्मति खोलाले हाँतिसुँडे–शिखरपुर–मन्थली जोड्ने दशघरेदेखि घ्याम्पेसम्मको सडक खण्ड समेत पूर्ण रुपमा बगाएको छ ।