मकवानपुरमा २ हजार बालबालिका पोलियो खोपबाट बन्चित

७ पुस, हेटौँडा । मकवानपुरका करिव २ हजार बालबालिका मासिक पोलियो खोप लगाउनबाट बन्चित भईरहेका छन् । खोप लगाउन मासिक रुपमा स्वास्थ्य संस्था पुग्ने गरेका करिव २ हजार बालबालिका पोलियो खोप नलगाई फर्कने गरेका हुन् । 
स्वास्थ्य संस्थाहरुले जिल्लामा पोलियो खोप नरहेको जानकारी दिने गरेको खोप लगाउन पुगेका आमाहरुले गुनासो गरेका छन् । दुई महिना लगातार पोलियो खोप लगाउन नपाईएको हेटौँडा–६ चौघडाकी सरिता खतिवडाले बताईन् । उनका अनुसार हेटौँडा हेल्थपोष्ट चौघडामा मंसिर र पुसमा खोप लगाउन जाँदा खोप नभएको भन्दै फिर्ता पठाएको छ । स्वास्थ्य संस्थाहरुले विसिजी खोप समेत महिना बिराएर लगाउने गरेका छन् । 
स्वास्थ्य सेवा विभाग अन्तरगत आपूर्ति महाशाखामा नै पोलियो खोपको मौज्दात नरहेको र यसको प्रभाव मकवानपुरमा पनि परेको जिल्ला स्वास्थ्य कार्यालय मकवानपुरका जनस्वास्थ्य निरीक्षक भोला चौलागाई बताए । उनका अनुसार विदेशबाट आपूर्ति गर्नुपर्ने खोप दुई महिनादेखि मौज्दात सकिएको हो । बिसिजि खोप भने खोप खेर गएर सरकारी खर्च दुरुपयोग नहोस् भन्ने उद्देश्यले देशभरी नै महिना विराएर लगाउने गरिएको जानकारी दिए ।
यसअघि पोलियो थोपा खुवाउने गरेकोमा गतबर्षदेखि पोलियो खोप लगाउन थालिएको छ । विभिन्न क्षेत्रलाई पूर्ण खोपयुक्त घोषणा गरिरहँदा बालबालिका खोप लगाउनबाट बन्चित हुनुपरेको भन्दै यथाशिघ्र खोपको व्यवस्था गर्न सेवाग्राहीको सरकारसँग माग छ ।

तस्विर : गुगल तस्विर