हाँडीखोलामा जलवायु परिवर्तन अनुकूलन योजना अध्यावधिक गरिंदै

८ पुस, हेटौँडा । हाँडीखोला गाविसमा स्थानीय जलबायु परिवर्तन अनुकूलन योजना (लापा) को अध्यावधिक गरिने भएको छ । हाँडीखोला गाविस कार्यालयले आयोजना गरेको स्थानीय जलबायु परिवर्तन योजना तथा विपद् जोखिम व्यवस्थापन समितिबीचको कार्यशालाले यस्तो योजना अद्यावधिक गर्ने निर्णय गरेको हो ।

योजना अध्यावधिक गर्दा केयर नेपाल र ग्रामीण महिला सेवा केन्द्रले प्राविधिक सहयोग गर्ने सहमति समेत भएको छ । गाविसभित्र रहेको लापा र विपद जोखिम व्यवस्थापन समितिले संयुक्त रुपमा विपद् तथा जलबायु परिवर्तनसम्बन्धी योजनाहरु निर्माण गर्ने र त्यसका लागि केही समयभित्रै संरचना तयार पारेर अघि बढ्ने समेत सहमति भएको ग्रामीण महिला सेवा केन्द्रका पोशक भण्डारीले बताए ।

कार्यक्रममा गाविसका सचिव राजु आचार्यले आगामी गाउँ परिषदमा विपद् जोखिम न्यूनिकरण र जलबायु परिवर्तन नियन्त्रणका लागि लापाले ल्याउने योजनामा बजेट बिनियोजन गर्न आफू प्रतिबद्ध रहेको बताएका थिए । केयर नेपालका निरज काफ्ले र देवता रिजालले सहजिकरण गरेको कार्यक्रममा वडा नागरिक मञ्चका संयोजकहरु, विद्यालयका प्रतिनिधिहरु, स्थानीय विपद् जोखिम व्यवस्थापन समितिका पदाधिकारीहरु, लापाका पदाधिकारी लगायतको सहभागिता रहेको थियो ।

तस्विर सौ.- शिवकुमार काशी