सदस्य सचिवले भने–गौरीटार रंगशालाको कामलाई गति दिन्छु

१७ साउन, हेटौँडा । ३ नम्बर प्रदेशका मुख्यमन्त्री डोरमणी पौडेल र राष्ट्रिय खेलकुद परिषदका सदस्य सचिव रमेशकुमार सिल्वालले शुक्रबार हेटौँडा–६ मा निर्माणाधिन राष्ट्रिय खेलकुद प्रतिष्ठानको निरीक्षण गरेका छन् । गौरीटारमा रहेको प्रतिष्ठानमा पुगेका मूख्यमन्त्री पौडेल र परिषदका सदस्य सचिव सिल्वालसहितका खेलकुद पदाधिकारी भईरहेका कामको बारेमा निरीक्षण गरेका हुन् । 
२२ विगाह क्षेत्रफलमा फैलिएको रंगशालामा अहिले फुटबल मैदान निर्माणको काम भईरहेको छ । प्रशिक्षणका लागि खेलाडीहरुलाई राखी दक्ष बनाईने र उनीहरुको प्रतिभा प्रस्फुटनको अवसर दिईने लक्ष्यका साथ राष्ट्रिय खेलकुद एकेडेमी निर्माण थालिएको थियो । तर कामले भने गति लिन सकेको छैन । निरीक्षण गरेपछि सदस्य सचिव सिल्वालले ‘स्लो मोसन’मा भईरहेको कामलाई गति दिने प्रतिवद्धता व्यक्त गरे । 
उनले काम प्रारमिभक चरणमा भईरहेको भन्दै अन्तराष्ट्रियस्तरको एकेडेमी बनाउन यही पूर्वाधारले नपुग्ने बताए । उनले खेल पिच्छेको खेल मैदान निर्माण, सुविधा सम्पन्न कर्भड हल, खेलाडि र प्रशिक्षक बस्ने ठाउँ र कन्फरेन्स र कक्षा संचालन गर्ने हलको आवश्यकता रहेको बताए । 
५ बर्षभित्र सम्पन्न गर्ने लक्ष्यका साथ १० बर्ष अघि २ अर्बको गुरुयोजना तयार गरी काम थालिएको प्रतिष्ठानमा अहिले होस्टल र केही संरचनामात्रै बनेको जिल्ला खेलकुद विकास समिति मकवानपुरका कार्यालय प्रमुख खुशराज दाहालले बताए । १० बर्ष अघि तयार भएको गुरुयोजना परिमार्जन आवश्यक रहेको बताउँदै उनले यसले लागत समेत एकिन हुने बताए । प्रदेश खेलकुद विकास समितिका सदस्य माधव तिमल्सिनाले प्रदेश सरकारले गौरीटार रगशालालाई प्राथमिकतामा राखेर काम गरेको दावि गरे ।
फुटबल र क्रिकेट मैदान, स्विमिङ पुल, टेनिङ सेन्टर, बहुद्देश्यीय कर्भड हलसहितका १४ वटा संरचना निर्माण गर्नुपर्ने प्रतिष्ठानमा सम्बन्धित निकायको उदासिनताका कारण कछुवा गतिमा काम भईरहेको छ ।