‘मनपरी’ गरेको भन्दै कैलाश गाउँपालिकामा कांग्रेसको तालाबन्दी

१७ साउन, हेटौँडा । मकवानपुरको कैलाश गाउँपालिकामा नेपाली कांग्रेसले तालाबन्दी गरेको छ । बजेट निर्माणका क्रममा गाउँपालिका अध्यक्ष टंकबहादुर मोक्तानले ‘मनपरी’ गरेको भन्दै कांग्रेसले तालाबन्दी गरेको हो ।
वडाबाट सिफारिस भएका योजनालाई गाउँपालिकाले समावेश नगराएको, समयमा बजेट नल्याएको र पक्षपाती ढंगले आफु निकटका अध्यक्षको वडामा मात्रै बजेट विनियोजन गरेको लगायतका आरोप लगाउँदै कांग्रेसले तालबन्दी गरेको ४ नम्बर क्षेत्रीय सभापति लोक मोक्तानले बताए । 
कार्यपालिका बैठकमा गाउँपालिकाका अध्यक्ष मोक्तानले एकपक्षीय ढंगले कांग्रेसबाट जितेका अध्यक्षहरुलाई पेलेर आफु खुशी योजना बाँडफाँड गर्न खोजेको तर त्यसो नगर्न आग्रह गर्दा वेवास्ता गरेपछि तालाबन्दी गरेको मोक्तानको भनाई छ । कांग्रेसले यसअघि नै गाउँपालिका उपाध्यक्षलाई ११ बुँदे ध्यानाकर्षण पत्र बुझाएपछि कुनै वास्ता नभएपछि आफुले समावेशी विकासको अवधारणा स्थापित गर्न तालाबन्दी गरेको बताए । कांग्रेस नेताहरुले गाउँपालिकाको कार्यालयमा तालाबन्दी गर्नुका साथै गाउँपालिका अध्यक्षको प्रवृत्ति गलत रहेको भन्दै नारावाजी गरेका थिए । विना सहमति आफु खुशी ताला खोले यसको जिम्मेवारी गाउँपालिकाले लिनुपर्ने कांग्रेसको चेतावनी छ ।
कांग्रेस जिल्ला सदस्य ज्ञानबहादुर डिमडुङ, क्षेत्रीय सदस्य मानबहादुर वाइवा, सिताराम सिन्तान, नेताहरु गुणराज स्यांतानसहित तरुण नेताहरुको उपस्थिति रहेको थियो । कैलाश गाउँपालिका विभिन्न कारणले विवाद पर्दै आएको छ । शिक्षक सरुवा, नियुक्ति, बजेट बाँडफाँट, गाउँपालिकाको बजेटबाट कम्युनिष्ट दर्शनको प्रशिक्षण लगायतका विषयमा पटक पटक विवाद हुँदै आएको छ ।