मकवानपुर पस्यो सडक कार्यालय, टहरा भत्काउन शुरु

File Photo

सुनिल शिवाकोटी

१८ साउन, हेटौंडा ।बाराको अमलेखगञ्ज , ३ नम्बर पुल र मकवानपुरको लोथर सहित मनहरी आसपासको क्षेत्रमा सडक विस्तार गरिरहेको डिभिजन सडक कार्यालय हेटौँडा मकवानपुर प्रवेश गरेको छ ।

बाराको अमलेखगञ्ज र ३ नम्बर पुलमा सडक विस्तारको काम शुक्रबार सकेको कार्यालयले पुनः मकवानपुरमा २५ मिटर सडक विस्तारको काम थाल्ने भएको हो । यसअघि मकवानपुरको लोथरबाट सडक विस्तार गरेकोमा स्थानीयले आफैं संरचना भत्काउन थालेकाले काम रोकेको कार्यालय नभत्काएका संरचना भत्काउने र मनहरी क्षेत्रमा सडक विस्तारको काम अघि बढाउने भएको कार्यालय प्रमुख सुमन योगेशले बताए । ‘मनहरीमा पनि स्थानीयले संरचना भत्काउने काम थालिसकेका छन्, नभत्काए कार्यालय भत्काउनेछ ।’–उनले भने ।

हेटौँडा बजार क्षेत्रमा सडक विस्तारको काम पनि कानूनी प्रक्रिया पुरा गरी अघि बढाउने कार्यालयको तयारी छ । बजार क्षेत्रका ९० प्रतिशत घरले सर्वोच्च अदालतबाट नभत्काउन अन्तरिम आदेश लिएर बसेकाले काम अघि नबढ्न सकेको छैन । कार्यालय अब यसलाई कानूनी रुपमै टुंग्याएर विस्तारको काम अघि बढाउन लागि परेको छ । ‘स्टे अर्डरको भ्याकेन्ट रिलिजका लागि प्रक्रिया अघि बढाए र आइतबार भ्याकेन्ट रिलिजका लागि छलफल हुने प्रष्ट खबरलाई जानकारी दिएका छन्। उनले भने– हाम्रो डोजर रेडी अवस्थामा छ ‘अदालती प्रक्रिया सहज भएको भोलिपल्ट हेटौंडा बजारमा  क्षेत्रमा पनि सडक विस्तार गर्छौ।