हेटौंडामा खुल्यो माटो र मल तथा विषादी अवशेष परिक्षण प्रयोगशाला 

२० साउन, हेटौँडा । हेटौंडामा माटो र मल परिक्षण प्रयोगशाला सँगै विषादी अवशेष परिक्षण प्रयोगशाला पनि सञ्चालनमा आएको छ । 
भुमि व्यवस्था, कृषि तथा सहकारी मन्त्रालय, कृषि विकास निर्देशनालय अन्र्तगत रहने प्रयोगशालाहरुको सोमबार प्रदेश ३ का मुख्यमन्त्री डोरमणि पौडेलले उद्घाटन गरेका हुन् । 
मुख्यमन्त्री पौडेलले उद्घाटन पछि प्रयोगशालाको अवलोकन समेत गरेका थिए ।
विषादी परिक्षण प्रयोगशाला कार्यान्वयन गर्न विषादी अवशेष द्रुत विष्लेषण कार्यविधि २०७५ मन्त्रिपरिषदबाट स्वीकृत भई प्रदेशको पाँच जिल्लामा प्रयोगशाला स्थापना गर्ने मन्त्रालयको तयारी रहेको मन्त्रालयका प्रवक्ता निर्मल गदालले जानकारी दिए । 
अवशेष प्रयोगशालाले प्रतिघण्टा २०–३० वटा तरकारी तथा फलफुलको नमुना परिक्षण गरि अर्गानोफस्फेट र कार्बोमेट समूहका किटनाशक विषादी र ढुँसीनाशक विषादीको परिक्षण गर्न सकिने छ भने परिक्षणको लागि थोक तथा खुद्र विक्रेता, कृषक र उपभोक्ताहरुले निशुल्क विषादी परिक्षण सेवा पाउने छन् ।
यस्तै मन्त्रालय मातहतमा रहने गरी स्थापना हुने माटो तथा मल परिक्षण प्रयोगशाला हेटौंडा, कृषि ज्ञान केन्द्र चितवन, ललितपुर, काभ्रे र नुवाकोटमा स्थापन गरिने पनि गदालले बताए ।
कार्यक्रममा भुमि व्यवस्था, कृषि तथा सहकारी मन्त्री दावा दोर्जे लामा, प्रदेश सभाका प्रमुख सचेतक रामेश्वर फुयाल, प्रदेश नीति तथा योजना आयोगका सदस्य श्याम वस्नेत, जिल्ला समन्वय समिति मकवानपुरका प्रमुख रघुनाथ खुलाल लगाएतको उपस्थिति रहेको थियो ।