फाखेल–सिस्नेरी रुटका सुमोमा जोर विजोर लागु हुने

२२ साउन, हेटौँडा । हेटौँडा काठमाडौं जोड्ने छोटो दुरीको फाखेल र सिस्नेरी सडकमा जोर विजोर प्रणालीमा सुमो संचालन हुने भएको छ ।

स्थानीय व्यवसायीले सवारी संचालनमा अवरोध गर्ने चेतावनी दिएपछि मकवानपुरका प्रमुख जिल्ला अधिकारी अस्मान तामाङको उपस्थितिमा मंगलबार बसेको बैठकले गत आर्थिक बर्षमा मूख्यमन्त्री डोरमणी पौडेलको अध्यक्षतामा मूख्यमन्त्री कार्यालयमा भएको छलफलमा निर्णय भएको भन्दै जोर बिजोर प्रणाली कार्यान्वयन गर्ने निर्णय गरेको हो । समस्या समाधानका लागि बसेको बैठकमा फाखेल तथा सिस्नेरी रुटमा जोर विजोर प्रणाली लागु गरी सुमो संचालन गर्ने यसअघि निर्णय भएकोमा यसलाई निरन्तरता दिई कार्यान्वयन गर्ने निर्णय भएको छ । 

त्यस्तै, भीमफेदी–कुलेखानी सडक रुट प्रयोग गरी ईन्द्रसरोबर गाउँपालिकाका ग्रामिण भेगमा कृषि उत्पादन, दैनिक उपभोक्ता बस्तु तथा निर्माण सामग्री ढुवानी गर्न गाउँपालिकाका मिनि ट्रक संचालन गर्न पाउने, गर्मीयाममा विहान ५ बजे अगाडि र बेलुकी ८ बजे पछाडि र जाडो याममा विहान ६ बजे अगाडि र बेलुका ७ बजे पछाडि मात्रै भीमफेदी कुलेखानी रुटमा ६ टन भन्दा कम भार वहन क्षमताको मिनि ट्रक प्रयोग गरी ढुवानी गर्ने निर्णयलाई कार्यान्वयन गर्ने निणर््य भएको छ ।

बैठकमा सहायक प्रमुख जिल्ला अधिकारी चिरन्जिवी शर्मा, ईन्द्रसरोबर गाउँपालिकाका अध्यष जीवन लामा, उपाध्यक्ष उमाकुमारी लामा, २ नम्बर वडा अध्यक्ष राजुमान महर्जन, ३ नम्बर वडा अध्यक्ष चिरञ्जीवी पौडेल, मकवानपुरका प्रहरी नायव उपरीक्षक यज्ञप्रसाद भट्टराई सशस्त्रका प्रहरी उपरीक्षक विकास घिमिरे लगायतको सहभागिता रहेको थियो ।