नेपाल वायु सेवा निगमको सुधारका लागी कार्य दल गठन

२२ साउन, हेटौँडा । सरकारले नेपाल वायु सेवा निगममा सुधार ल्याउने गरी सुझाव दिन पाँच सदस्यीय कार्य दल गठन गरेको छ ।
नवनियुक्त संस्कृति, पर्यटन तथा नागरिक उडड्यनमन्त्री योगेशकुमार भट्टराईले नेपाल वायु सेवा निगममा समग्र सुधार ल्याउने गरी आवश्यक सुझाव दिन पूर्व पर्यटन सचिव सुशिल घिमिरेको संयोजकत्वमा ५ सदस्यीय ‘नेपाल वायु सेवा निगम सुधार सुझाव कार्यदल’ गठन गरेका हुन् ।
समितिका सदस्यहरुमा चार्टर एकाउन्टेन्ट प्रमोद कर्ण, व्यवस्थापन विज्ञ डिमप्रकाश पौडेल, विमान चालक सुधीर शमशेर राई र सदस्य सचिवको रुपमा संस्कृति, पर्यटन तथा नागरिक उडड्यन मन्त्रालयका सहसचिव बुद्धिसागर लामिछाने रहेका छन् ।
बुधबार मन्त्रालयमा आयोजित पत्रकार सम्मेलनमा राष्ट्र हित, जनताको हित र नेपाली ध्बजावाहक विमानको अन्तराष्ट्रिय क्षेत्रमा प्रतिष्ठा बढने गरी एक महिना भित्र सुझाव दिन कार्यदल गठन गरिएको मन्त्री भट्टराईले जानकारी दिए ।
निगमको सुधारका लागि आफूले पटक पटक त्यहाँको व्यवस्थापनसँग आवश्यक छलफल गरिरहेको जानकारी गराउँदै मन्त्री भट्टराईले निगमका पदाधिकारीहरुसँग आफूले विजनेश प्लानको विषयमा पनि छलफल गरिरहेको बताएका छन् । उनले सो निगमलाई गर्व गर्न लायक बनाउने प्रतिवद्धता पनि व्यक्त गरे ।
मन्त्री भट्टराईले अव छिट्टै चीन र दक्षिण कोरियामा पनि नेपालले हवाई सेवा संचालन गर्ने योजना रहेको जानकारी गराउँदै निजगढ अन्तराष्ट्रिय विमानस्थलको शिलान्यास चालू आर्थिक वर्ष भित्र सुरु गर्ने घोषणा पनि गरे ।
मन्त्री भट्टराईले राजनीतिक सहमति जुटाएर सो विमानस्थलको निर्माणको कामलाई अघि बढाउने र विमानस्थल निर्माणका लागी लगानीको व्यवस्था गर्न लगानी बोर्डसँग पनि छलफल गर्ने पनि बताए ।