पञ्चकन्या आधारभुत विद्यालयको भवन हस्तान्तरण

२२ साउन, हेटौँडा । हेटौँडा–१८ मा रहेको पञ्चकन्या आधारभुत विद्यालयको नवनिर्मित भवन उद्घाटन एवं हस्तान्तरण कार्यक्रम बुधबार सम्पन्न भएको छ ।
प्रदेशसभा सदस्य प्रेमबहादुर पुलामीको प्रमुख आतिथ्यता एवं विद्यालय व्यवस्थापन समितिका अध्यक्ष विमल बानियाँको सभाध्यक्षतामा कार्यक्रम भएको हो । कार्यक्रममा निर्माण कम्पनी स्वच्छन्द/खानी/बानियाँ जेभीका प्रतिनिधि कपिल बानियाँले विद्यालयको साँचो भुकम्प पुर्ननिर्माण प्राधिकरण जिल्ला कार्यान्वयन ईकाई (शिक्षा) प्रमुख बद्रीबहादुर पाठकलाई हस्तान्तरण गरेका थिए भने पाठक, प्रदेशसभा सदस्य पुलामी र १८ नम्बरका वडा अध्यक्ष अनिल बानियाँले संयुक्र रुपमा विद्यालयका अध्यक्ष विमल बानियाँलाई साँचो हस्तान्तरण गरेका थिए । 
कार्यक्रममा प्रदेशसभा सदस्य पुलामी, प्राधिकरण शिक्षा प्रमुख पाठक,  वडा अध्यक्ष बानियाँ, जाईका परामर्शदाता रोजेशगोविन्द श्रेष्ठ, अभिभावक गोपाल न्यौपाने, विद्यालय व्यवस्थापन समितिका सदस्य दिपेन्द्र बानियाँ लगायतले मन्तव्य व्यक्त गरेका थिए । ४ कोठे २ तल्ले २ वटा भवन र शौचालय जापानको ‘ओडिए ऋण’ अन्तरगत १ करोड ९३ लाख ८ हजार ८ सय ७५ रुपैँयामा निर्माण भएको हो । निर्माण कम्पनीले २०७३ असोजमा काम शुरु गरी २०७५ चैत १७ गते भवन निर्माण सम्पन्न भएको थियो । 
पुर्ननिर्माणमा परेका मकवानपुरका ४१ वटा विद्यालय मध्ये बानियाँलाई पहिलो प्याकेज अन्तरगत ७ वटा विद्यालय निर्माणको ठेक्का परेको थियो । पञ्चकन्याको भवन हस्तान्तरणसंगै ७ वटै विद्यालय भवन हस्तान्तरण सम्पन्न भएको प्राधिकरण शिक्षा इकाई प्रमुख पाठकले जानकारी दिए ।