धामीझाँक्रीलाई पनि भिसा अनिवार्य

२४ साउन, हुम्ला । मानसरोवर-कैलाश तीर्थयात्रामा आउने धामीझाँक्रीलाई पनि चीनले भिसा अनिवार्य गरेको छ । 
बर्षौदेखि यहाँका धामीझाँक्रीबिना रोकतोक मानसरोवर–कैलाश तीर्थयात्रामा जाने गरेका थिए । भिसाको व्यवस्था गरिए पनि हुम्लाका धामीझाँक्रीको एउटा टोली जिल्ला प्रशासनको सिफारिस लिएर मानसरोवर यात्रामा निस्किएको समाचार कान्तिपुरले बनाएको छ । 
धार्मिक, सांस्कृतिक परम्पराअनुसार बर्सेनि साउने पूर्णिमामा धामीझाँक्रीले कैलाश मानसरोवर गएर स्नान गर्ने गरेका छन् । पहिलोपटक धामी बनेकाहरूले मानसरोवर तालमा गएर नुहाउनैपर्ने चलन छ । चीन सरकारले भिसा खोजेपछि हुम्लाका ४१ धामीझाँक्री जिल्ला प्रशासनको सीमा पास सिफारिस बनाएर मानसरोवर यात्रामा निस्केको प्रमुख जिल्ला अधिकारी विनिता भट्टराईले बताइन् । 
वषौँदेखि बेरोकतोक मानसरोवरको धार्मिक यात्रा गर्दै आएकाहरूलाई भिसा लिएर जानुपर्ने बाध्यकारी व्यवस्थाले अप्ठेरो पारेको सिमकोट–६ को कालासिल्तादेवीका धामी जुना रोकायले बताइन् । पहिलोपटक कैलाश मानसरोवर जान २०७० मा भिसा अनिवार्य नियम लागू गरिएको थियो । 
उक्त व्यवस्था लागू भएयता तीन वर्षसम्म धामीझाँक्री सीमा प्रवेश पास लिएर आउजाउ गर्दै थिए । यो वर्ष चिनियाँ नाका प्रवेशमा थप कडाइ गरिएको उनको भनाइ छ ।