जवान महिलाहरुमा बढ्दैछ हृदयघातको समस्या 

२४ साउन, हेटौँडा । एक नयाँ अनुसन्धानमा जवान महिलाहरुमा हृदयघातको खतरा बढ्दो रहेको पत्ता लागेपछि अध्ययनकर्ताहरु यसको कारणबारे खोजी गरिरहेका छन् । 
पाँचवर्षको अन्तरालमा गरिएको विश्लेषणपछि हृदयघातका कारण अस्पताल भर्ना हुने ३५ देखि ५४ वर्षीय बिरामीको दर २७ प्रतिशतबाट ३२ प्रतिशत पुगेको देखिएको हो । जसमा पनि जवान महिलाहरुमा यो रोग सबैभन्दा धेरै वृद्धि भएको पाइएको छ । 
५ वर्षको अनुसन्धानमा जवान पुरुषहरुमा हृदयघातको दर केबल ३ प्रतिशतले वृद्धि भएको छ भने यता युवतीहरुमा चाहिँ यही रोग २१ प्रतिशतबाट ३१ प्रतिशत पुगी १० प्रतिशत वृद्धि भएको देखिएको हो ।
अनुसन्धान प्रमुख मेलिसाका अनुसार हाम्रो जनसङ्ख्या बूढो हुँदै गइरहेपनि युवा बिरामीहरुमा ह्दयघात बढी देखिनु असामान्य कुरा हो । यसकारण पनि यो विषयलाई  चिन्ताजनक मानिएको उनी बताउँछिन् । 
मुटुले पर्याप्त रगत प्राप्त गर्न नसक्दा नै मानिसलाई ह्दयघात हुने गर्दछ । हरेक वर्ष अमेरिकामा मात्र करिब ८ लाख मानिसलाई हृदय सम्बन्धी रोगका कारण ह्दयघात हुने गरेको छ जसलाई मृत्युको सबैभन्दा प्रमुख कारण मानिन्छ ।
विश्वव्यापी रुपमा पनि हृदय सम्बन्धी रोगबाट हुने ८५ प्रतिशत मृत्यु हृदयघात या स्ट्रोककै कारण हुने गरेको विश्व स्वास्थ्य संगठनको भनाइ छ । 
यसरी अमेरिकामा गरिएको विश्लेषणपछि ३० प्रतिशत अस्पताल भर्ना हुने बिरामी ३४ देखि ५४ वर्षको हुने गरेको पाइएको हो । सो समुहमा ह्दयघातका कारण भर्ना हुने युवकहरुको दर भने १९९५ देखि २०१४ का बीच कम भएको देखिएको छ तर यता जवान महिलाको सङ्ख्यामा भने उलेखनीय वृद्धि भएको हो । 
यसरी यो नतिजालाई वैज्ञानिकहरुले आश्चर्यजनक मानिरहेका छन् र यसको कारणबारे विभिन्न विवाद भइरहेको बताइएको छ । कसैले यसमा मोटोपना जस्ता कारक जिम्मेवार हुन सक्ने अनुमान गरेका छन् भने निद्राको कमी, उच्च रक्तचाप र तनाव लगायतका कारण पनि यस्तो भइरहेको हुन सक्ने बताएका छन् । 
पछिल्लो समय मानिसहरु शारीरिक रुपमा सक्रिय नभएर आफ्नो टेबलमै बढी समय बिताउने गरेकाले पनि शारीरिक अभ्यासको कमीका कारण यस्तो नतिजा निस्किएको  बताइएको छ । गत वर्ष प्रकाशित एक जर्नलमा ५५ वर्ष भन्दा मुनिका युवामा, पुरुषहरुको तुलनामा महिलाहरुमा ह्दयघातको लक्षण बढी देखा पर्ने गरेको बताइएको थियो । तर छाति दुख्ने जस्ता लक्षण देखिएपनि अधिकंश महिलालाई यसबारे थाहा नहुने गरेको बताइएको छ । (बाह्खरी÷सीएनएन)