हेटौँडा–६ र ७ मा डेंगुको ‘खोजि र नष्ट’ अभियान

२४ साउन, हेटौँडा । हेटौँडा उपमहानगरपालिका नगर स्वास्थ्य समन्वय इकाईले हेटौँडा वडा नम्बर ६ र ७ मा शुक्रबार डेंगुका सार्ने लामखुट्टेका लार्भा र प्युपाको ‘खोजी तथा नष्ट’ अभियान संचालन गरिएको छ । हेटौँडा उपमहानगरपालिकामा डेंगुका विरामी बढेसंगै अभियान संचालन गरिएको हो । 
वडा नम्बर ६ मा भएको कार्यक्रममा बंशगोपाल स्कूल छेउछाउको क्षेत्रमा खोजि एवं नष्ट अभियान संचालन गरिएको थियो । यसक्रममा डेंगु सार्ने लामखुट्टाका लार्भा र प्युपा भेटिएका थिए । कार्यक्रममा वडा नम्बर ६ का कार्यवाहक अध्यक्ष राजकुमार बास्तोला, नगरकार्यसमिति सदस्य कल्पना विक, वडा सदस्यहरु रामहरी राई, शुभद्रा तिमल्स्निा, नगर स्वास्थ्य समन्वय इकाईका प्रमुख सुपेन्द्र कार्की, मेलानका केन्द्रीय सचिवालय सदस्य उत्सव चौलागाई, टोल विकास संस्थाका पदाधिकारीहरु, क्लवका प्रतिनिधि, सुरक्षा निकाय लगायतको सहभागिता रहेको थियो ।
यसैगरी, हेटौँडा वडा नम्बर ७ मा पनि वडा अध्यक्ष राजन थापा लगायतको उपस्थिति शुक्रबार नै अभियान संचालन गरिएको थियो ।
डेंगु सार्ने लामखुट्टेका लार्भा र प्युपा फालिएका टायर, प्लाष्टिकका बोतल, गमला, गाईबस्तुलाई पानी खुवाउने डुँड, ड्रम लगायतमा रहेको सफा पानीमा पाईने भएकाले यसतर्फ सचेत रहन र बासस्थान नै नष्ट गर्न स्वास्थ्यकर्मीहरुको सुझाव छ । अभियानमा प्रदेश स्वास्थ्य निर्देशनालय, जिल्ला स्वास्थ्य कार्यालय लगायतका निकायहरु जुटेका छन् । हेटौँडामा मात्रै ८७ जनामा डेंगु फेला परिसकेको छ ।