रसायनिक मलको कालोबजारी गर्ने दुइजना पक्राउ

२५ साउन, लहान । सिरहा नगरपालिका १२, सारश्वर र बेल्हा टोलका दुईजना रसायनिक मलको डिपो सञ्चालकलाई प्रहरीले पक्राउ गरेको छ । 
बिक्रिका लागि तोकिएको भन्दा बढी मूल्य लिएर रसायनिक मल बिक्रि गरेको पाइएपछि सारश्वरस्थित रोहित खाद्य भण्डार तथा जेनरल स्टोरका सञ्चालक ४२ वर्षीय सन्तोष प्रसाद गुप्ता र अनिल खाद्य एवं जेनरल स्टोरका सञ्चालक ४५ वर्षीय भगिरथ साहलाई पक्राउ गरि कारबाहीअघि बढाइएको सिरहा प्रहरीका सूचना अधिकारी अपीलराज बोहराले जानकारी दिएको खबर नागरिक दैनिकमा छ ।
रोहित खाद्य भण्डारबाट प्रहरीले युरिया मल २२ बोरा, डिएपी मल ४ बोरा, हिरा मल २ बोरा सरदार मल १ बोरा र पोटास मल १ बोरा बरामद गरेको छ। अनिल खाद्य भण्डारबाट प्रहरीले १४ बोरा युरिया मल, १ बोरा डिएपी मल तीन पोका खुल्ला मल बरामद गरिएको बोहराले बताए।
साल्ट ट्रेडिङ लिमिटेड र कृषि सामग्री कम्पनी लिमिटेडबाट रसायनिक मल खरिद गरी स्थानीयस्तरमा वितरणको जिम्मेवारी पाएका यी खाद्य डिपोहरु तोकिएभन्दा बढी मूल्यमा रसायनिक मल बिक्री गरिरेहेको किसानहरुको व्यापक गुनासो छ।  सखुवानन्कारकट्टी गाउँपालिका सोठियाइनका बालकृष्ण यादवका अनुसार मलखाद्य डिपोका नाममा गाउँगाउँमा कालोबजारियाहरुको बिगबिगी बढेको छ। जसका कारण किसानहरू मारमा परेका छन्।