रेडियो मकवानपुरले तीजका अवसरमा जागरुक महिला सम्मान गर्ने

२५ साउन, हेटौँडा । दिव्यतारा बहुउद्देश्यीय सहकारी संस्था लिमिटेडद्वारा सञ्चालित हेटौंडाकै पहिलो सामुदायिक रेडियो, रेडियो मकवानपुर १०१ दशमलव ३ मेगाहर्जले हिन्दु महिलाहरुको महान पर्व हरितालिका तीजको अवसरमा यस बर्ष पनि जागरुक महिला सम्मान कार्यक्रमको आयोजना गर्ने भएको छ ।
यही भदौ १२ गते बिहीबारका दिन तीज विशेष कार्यक्रमको आयोजना गरी २ महिलालाई ‘जागरुक महिला सम्मान–२०७६ प्रदान गरिने रेडीयोले जनाएको छ ।
नगद १० हजार रुपैयाँसहित दुई महिलालाई जागरुक महिला सम्मान प्रदान गरिने रेडियो सञ्चालक समितिका अध्यक्ष आनन्दराम पराजुलीले जानकारी दिए । 
जागरुक महिला सम्मानमा सम्मानित हुने व्यक्तिको छनौटको लागि रेडियो सञ्चालक समितिका सदस्य राममणि दाहाल, शर्मिला डंगोललगायतको समिति निर्माण गरिएको छ । 
जागरुक महिला सम्मानबाट यसअघि २०७० सालमा गढीका सीतादेवी तिमल्सिना र आमभञ्ज्याङका सुलोचना स्याङ्तान, २०७१ मा हेटौंडा–२ का सरिता खरेल र बज्रबाराहीका चमेली वाइबा, २०७२ मा चुरियामाइका मञ्जु थिङ र हेटौंडा–१ का सुनिता नकर्मी सम्मानित भैसकेका छन् । 
यस्तै २०७३ मा हेटौंडा–२ का कल्पना शर्मा र दामनका हीरा लामा, २०७४ मा हेटौंडा–८ का साहित्यकार बबी थापा र हेटौंडा–१० का महिला उद्यमी सुन्दिरा श्रेष्ठलाई सम्मान गरिएको थियो भने गत बर्ष हाँडीखोलाका ईश्वरी न्यौपाने र हेटौंडा–२ का सूचना श्रेष्ठ पराजुलीलाई सम्मान गरेको थियो ।
जागरुक महिला सम्मान कार्यक्रमको आवश्यक तयारी अघि बढाइएको रेडियोका स्टेशन मेनेजर गणेश दर्पण अधिकारीले जानकारी दिए । 
कार्यक्रममा संविधानसभा सदस्य एवम् नेपाली कांग्रेसकी नेतृ आरजु देउवा राणा प्रमुख अतिथि एवम   सहकारीका अध्यक्ष महालक्ष्मी उपाध्याय डीनाको विशेष उपस्थिती रहने मेनेजर अधिकारीले बताए ।