तेहरो करविरुद्ध अर्थमन्त्रीलाई फेकोफनको ज्ञापनपत्र

२६ साउन, हेटौँडा । सामुदायिक वनमा लगाईएको तेहरो कर विरुद्ध सामुदायिक वन उपभोक्ता महासंघ मकवानपुरले अर्थमन्त्रीलाई ज्ञापनपत्र बुझाएको छ । मकवानपुरका प्रमुख जिल्ला अधिकारी अस्मान तामाङमार्फत अर्थमन्त्री युवराज खतिवडालाई ज्ञापनपत्र बुझाएको हो ।

फेकोफन मकवानपुरका अध्यक्ष साधुराम चौलागाईले तामाङमार्फत खतिवडालाई ज्ञापनपत्र बुझाएका थिए । हालै सरकारले नेपाल ऐन संशोधन गर्न बनेको विधेयक, आर्थिक ऐन र तत्सम्बन्धी प्रदेशमार्फत प्रस्तावित विधेयकहरुमा पनि सामुदायिक वनमा तेहरो कर लगाउने कार्यको महासंघले विरोध गरेको छ । संघीय सरकारले संघीय संचितकोषमा १५ प्रतिशत, प्रदेश संचित कोषमा २५ प्रतिशत, प्रदेश सेवा शुल्कमा २ प्रतिशत कर लगाउने तयारी गरेको छ । यसैगरी, स्थानीय सरकारको संचित कोषमा १० प्रतिशत र आयकर ऐन २०५८ बमोजिम उपभोक्ता समूहको बचत रकममा आय कर २५ प्रतिशत लगाउने तयारी छ ।

ज्ञापनपत्रमा स्थानीय उपभोक्ताहरुको सक्रियतामा सामुदायिक वनको विकास र विस्तार विश्वसामु फैलिएको सन्दर्भमा यस्ता कर लगाउने न्यायोचित नहुने उल्लेख गरिएको छ । देशको गरिबी निवारणमा सामुदायिक वनको योगदान ४ प्रतिशत रहेको तथ्यलाई सरकारले विर्सिएर ल्याउन लागेको विधेयक सामुदायिक वनको मर्म विपरित रहेको ज्ञापन पत्रमा उल्लेख गरिएको छ ।

कार्यक्रममा फेकोफन ३ नम्बर प्रदेशका सदस्य रामहरी चौलागाई, फेकोफन जिल्ला कोषाध्यक्ष बलराम अधिकारी, हेटौँडा नगर अध्यक्ष शम्भुप्रसाद न्यौपाने, विभिन्न सामुदायिक वनका अध्यक्ष तथा वनकर्मीहरुको सहभागिता रहेको थियो ।