मकवानपुरमा धान खेतमा फेला पर्यो गाँजा

३० साउन, हेटौँडा । गाँजा, अफिमजस्ता लागु पदार्थ उत्पादन र असार प्रसारको ट्रान्जिट प्वाइन्ट मानिने मकवानपुरमा कारोबारीले कारोबारको नयाँ नयाँ तरिका अपनाउने गरेका छन् । 
मकवानपुरमा उत्पादित लागुऔषध अन्य क्षेत्रमा लैजान होस् या अन्य क्षेत्रबाट मकवानपुर हुँदै लागुऔषध नेपालका प्रमुख शहरमा आसारपसार गर्न नयाँ नयाँ शैली अपनाउने गरेपछि प्रहरी समेत चनाखो बनेको छ । मकवानपुर प्रहरीले पनि ‘सरप्राईज एम्बुस’ थप्नेदेखि सवारी साधनमा निगरानी बढाएको छ ।
मकवानपुर प्रहरीले विहिबार पनि जिल्लाका दुई स्थानमा लागुऔषध गाँजा बरामद गरेको छ । गाँजा ओसारपसारमा संलग्न दुई जनालाई पनि प्रहरीले नियन्त्रणमा लिउको छ ।
हेटौंडा १० बसपार्क र हेटौंडा १९ नेवारपानीमा गरी प्रहरीले १ सय १२ केजी जाँजा बरामद गरेको हो । 
पालुङबाट बीरगंजतर्फ जाँदै गरेको बा५ख १८२५ नम्बरको मिनि ट्रकलाई हेटौँडा–१० बसपार्कमा जाँच गर्ने क्रममा चालकको सिटमुनी ‘फल्स बटम’ बनाई ५९ किलो ५ सय ८० ग्राम गाँजा बरामद गरेको थियो । गाँजासहित प्रहरीले मकवानपुर कैलाश गाउँपालिका वडा नम्बर ६ बस्ने २० बर्षीय भीमसेन मोक्तान र २६ बर्षीय रोशन लामालाई पक्राउ गरिएको जिल्ला प्रहरी कार्यालय मकवानपुरका प्रहरी उपरिक्षक मुकेश कुमार सिंहले बताए । 
यस्तै हेटौँडा–१९ नेवारपानी बिचटोलमा धानखेतमा लुकाई राखेको ५३ किलो गाँजा बरामद भएको छ । गाँजा कसको हो भन्नेबारेमा अनुसन्धान अघि बढाएको पत्रकार सम्मेलनमा प्रहरी उपरीक्षक सिंहले जानकारी दिए ।