रानी सामुदायिक वनको कारोवार २६ लाख

२९ साउन, हेटौँडा । हेटौडा–६, चौघडामा रहेको रानी सामुदायिक वन उपभोक्ता समूहले आव ०७५÷०७६ मा २६ लाख २० हजारको कारोवार गर्न सफल भएको छ । 
समूहले चिरानी काठ विक्रीबाट २२ लाख ३७ हजार, बाकल विक्रीबाट १ लाख ३५ हजार, सालको गोलाई काठ विक्रीबाट ५९ हजार, दाउरा विक्रीबाट ५७ हजार र अनुदानबाट २५ हजार आम्दानी गरेको छ । यसैगरी नवीकरण शुल्कबाट २२ हजार, बला विक्रीबाट २१ हजार, अवलोकन शुल्कबाट २१ हजार, हलभाडाबाट १७ हजार आम्दानी गरेको समूहका अध्यक्ष कृष्ण विडारीले बताए ।
यसैगरी काठ चिरानी ज्यालामा १२ लाख, कर्मचारी तलवमा २ लाख ७१ हजार, कर्मचारी कल्याण कोषमा १ लाख ५० हजार, वन व्यवस्थापनमा १ लाख ८८ हजार र अवलोकन भ्रमणमा ९६ हजार खर्च भएको छ । यसैगरी साधारण सभामा १ लाख १० हजार, प्रतिक्षालय निर्माणमा १ लाख ७२ हजार, विभिन्न कार्यक्रममा ७४ हजार, बाकल ढुवानीमा ७० हजार, डकुमेन्ट्री निर्माणमा ५० हजार, आर्थिक सहयोगमा ४८ हजार, वातावरण दिवसमा ३४ हजार, पोशाक खरीदमा ४५ हजार, छात्रवृतिमा २० हजार र गोवरग्यास अनुदानमा १५ हजार खर्च भएको समूहका कोषाध्यक्ष बसन्त अधिकारीले बताए । 
२०५७ सालको सर्वमान्य गणेशमान सिह वन संरक्षण प्रथम पुरस्कार प्राप्त गरेको समूहले संरक्षित सूचीमा रहेको सालकको २०६३ सालदेखि संरक्षण गर्दै आईरहेको छ । हाल करीव १ दर्जन सालक रहेको समूहका कार्यालय सचिव भीमसेन पौडेलले बताए । 
 समूहले आव ०७५÷०७६ को जिल्ला स्तरीय वन्यजन्तु संरक्षण प्रथम पुरस्कार प्राप्त गरेको छ । राष्ट्रिय तथा अन्तराष्ट्रिय अवलोकनकर्ताको रोजाईमा परेको यो समूहको हाल सम्म ५ सय ६० भन्दा बढी समूहले अवलोकन गरिसकेको समूहले जनाएको छ ।