मुख्यमन्त्री पौडेलले गरे कृषि फार्मको अवलोकन

१ भदौ, हेटौँडा । प्रदेश नम्बर ३ का मुख्यमन्त्री डोरमणी पौडेलले मकवानपुरगढी गाउँपालिकाले आधुनिक कृषि प्रणाली अवलम्वन गरेर समृद्धिको मार्ग लिएको भन्दै खुशी व्यक्त गरेका छन् । 
मकवानपुरगढी गाउँपालिका तथा हेटौंडा उपमहानगरका विभिन्न कृषि फर्महरुको शनिवार अवलोकन गर्दै मुख्यमन्त्री पौडेलले यस्तो बताएका हुन् ।
किसानहरुले लगाएको विभिन्न प्रजातिको घाँस, गाई पालन केन्द्र, दुग्ध सङ्कलन केन्द्रहरुको अवलोकन गर्दै मुख्यमन्त्री पौडेलले गढी गाउँपालिका आफूले विगतमा देखेको र हाल सोचेको भन्दा निक्कै फरक र समृद्ध पाएको बताए ।
मुख्यमन्त्री पौडेलले मकवानपुरगढी ३ मा रहेको दाहाल कृषि तथा पशु पालन फारम, सोही वडाको सुजल गाई फारम, देवीडाँडा गाई फारम, मनकामना दुग्ध उत्पादक सहकारी सस्था तथा हेटौंडा ६ मा रहेको मञ्जुश्री आधुनिक फूल एवम् तरकारी खेतीको अबलोकन गरेका थिए ।
अवलोकनका क्रममा  मुख्यमन्त्री समक्ष किसानहरुले आफूले भोग्दै आएका समस्याका बारेमा जानकारी गराएका थिए । 
उक्त अवसरमा मुख्यमन्त्री पौडेलले किसानहरुका समस्या समाधान गर्न र किसानका उत्पादनलाई सहजरूपमा बिक्री बितरण गर्ने वातावरण मिलाउन प्रदेश सरकारले भूमिका खेल्ने प्रतविद्धता समेत व्यक्त गरेका छन् । 
छलफलका क्रममा मुख्यमन्त्री पौडेलले प्रदेश सरकारले कृषि क्षेत्रलाई विशेष प्राथमिकतामा राखी विभिन्न कार्यक्रम सञ्चालन गर्ने योजना रहेको जानकारी गराएका थिए । फोटो सौजन्यः प्रकाश दाहाल