सर्बदलिय बैठकः एकताबद्ध भएर अगाडि बढ्न सबै दल सहमत 

४ भदौ, हेटौँडा । प्रमुख राजनीतिक दलहरु सङ्घीयता, गणतन्त्र, लोकतान्त्रिक व्यवस्था र संविधानको पक्षमा एकताबद्ध भएर अगाडि बढ्ने भएका छन् । 
मंगलबार प्रधानमन्त्री केपी शर्मा ओलीले आफ्नै निवास बालुवाटारमा बोलाएको सर्वदलीय बैठकमा सहभागी दलका शीर्ष नेताले सङ्घीय लोकतान्त्रिक गणतन्त्रमाथि प्रहार भइरहेको भन्दै एकताबद्ध भएर अगाडि बढ्ने प्रतिबद्धता व्यक्त गरेको नेपाल कम्युनिष्ट पार्टी (नेकपा) का प्रवक्ता नारायणकाजी श्रेष्ठले जानकारी दिए ।
प्रवक्ता श्रेष्ठका अनुसार बैठकमा प्रतिपक्ष दल नेपाली कांग्रेसका सभापति शेरबहादुर देउवा र समाजवादी पार्टी नेपालका संघीय अध्यक्ष डा बाबुराम भट्टराईसहित अन्य नेताले गणतन्त्र, सङ्घीयता, लोकतान्त्रिक प्रणाली र संविधानको रक्षाका लागि ऐक्यबद्धता जनाएका हुन् ।
बैठकमा प्रधानमन्त्रीले शान्ति प्रक्रियाका बाँकी काम पनि पूरा गर्नुपर्नेमा जोड दिँदै देशमा फेरि कुनै प्रकारको हिंसात्मक गतिविधि हुन नदिने बताएका थिए । हिंसात्मक गतिविधिलाई प्रोत्साहित गर्न नहुने प्रधानमन्त्रीको भनाइ थियो । 
संविधान र कानून विरोध गतिविधिलाई जसरी भएपनि नियन्त्रण गर्नुपर्ने निष्कर्ष निकालिएको भन्दै आवश्यक परे वार्तामार्फत समस्याको समाधान गर्नुपर्दछ भन्नेमा सबै दल सहमत भएको प्रवक्ता श्रेष्ठले जानकारी दिए । 
हिजो मंगलबारको बैठकमा समसामयिक राजनीति संगै प्रधामन्त्रीले आफ्नो स्वास्थ्य बारे पनि नेताहरुलाई जानकारी गराएका थिए । 
सर्वदलिय बैठक आज बुधबार पुनः बस्ने भएको छ । आजको बैठकमा सत्य निरुपण तथा मेलमिलाप आयोग र बेपत्ता छानबिन आयोगको पदाधिकारी चयन र शान्ति प्रक्रियाका बाँकि काम कसरि सम्पन्न गर्ने भन्ने विषय केन्द्रित छलफल हुने प्रवक्ता श्रेष्ठले जानकारी दिए ।
बैठकमा नेकपाका अध्यक्ष पुष्पकमल दाहाल ‘प्रचण्ड’, नेकपाका सचिवालय सदस्य झलनाथ खनाल, नेपाल समाजवादी पार्टीका अध्यक्ष उपेन्द्र यादव, सङ्घीय अध्यक्ष बाबुराम भट्टराई, राजपाका नेता महन्थ ठाकुर, कांग्रेसका नेता कृष्ण सिटौला, मिनेन्द्र रिजाल, राष्ट्रिय जनता पार्टीका अध्यक्ष मण्डलका संयोजक राजकिशोर यादव लगाएतको उपस्थिति रहेको थियो ।