इंग्लिस प्रिमियर लिगः लिभरपुलको लगातार तेस्रो जित

८ भदौ, हेटौंडा । इंग्लिस प्रिपियर लिग फुटबलमा लिभरपुलले लगातार तेश्रो जित निकालेको छ । शनिवारराति घरेलु मैदानमा लिभरपुलले आर्सनलमाथि ३–१ को जित निकाल्दै विजयी यात्रालाई निरान्तरता दिएको हो ।
लिभरपुलको जितमा मोहम्मद सलाहको दुई गोल महत्वपूर्ण रह्यो । लिभरपुलले यसअघि नर्विच सिटीलाई ४–१ ले तथा साउथह्याम्पटनलाई २–१ ले हराएको थियो । 
शनिवारको खेलको ४१औं मिनेटमा जोएल माटिपको गोलमा लिभरपुल पहिलो हाफमा १–० ले अघि बढेको थियो ।
दोस्रो हाफको शुरुमै लिभरपुलले पेनाल्टीमार्फत अग्रता दोब्बर बनायो । आर्सनलमा डिफेन्डर डेभिड लुइजले सलाहलाई लडाएपछि प्राप्त पेनाल्टीमा सलाह आफैले गोल गरेका थिए ।
५८औं मिनेटमा सलाहले फाविन्होको पासमा व्यक्तिगत दोस्रो गोल गर्दै लिभरपुलाई ३–० ले अघि बढाए । 
८५औं मिनेटमा लुकास टोरेराले गोल गर्दै आर्सनललाई खेलमा फर्काउने संकेत दिएपनि त्यो पर्याप्त भएन ।
लगातार तेस्रो जितसँगै लिभरपुल ३ खेलबाट ९ अंक जोडेर शीर्ष स्थानमा रहेको छ । पराजित आर्सनल समान ३ खेलबाटै ६ अंक जोडेर दोस्रो स्थानमा रहेको छ । आर्सनलको भने यो पहिलो हार हो । आर्सनलले यसअघि न्यु क्यासलमाथि १–० को तथा बर्नलीमाथि २–१ को जित निकालेको थियो । (एजेन्सी)