प्रदेशसभामा लोकसेवासहितका विधेयक पेश

८ भदौं, हेटौँडा । २ महिनापछि बसेको ३ नम्बर प्रदेशको प्रदेशसभा बैठकमा आइतबार आधा दर्जन विधेयक पेश भएका छन् । प्रदेशसभा भवन हेटौँडामा बसेको बैठकमा दुईवटा समितिको प्रतिवेदनसहित आधा दर्जन विधेयक पेश भएका हुन् ।
बैठकमा प्रदेश मामिला समितिका सभापति माधव पौडेलले प्रदेश सूचनाको हकसम्बन्धी विधेयक समितिको प्रतिवेदनसहित पेश गरेका थिए भने शिक्षा, स्वास्थ्य तथा कृषि समितिका सभापति घनश्याम दाहालले मदनकुमार भण्डारी स्वास्थ्य विज्ञान प्रतिष्ठान सम्बन्धी विधेयक प्रतिवेदनसहित पेश गरेका छन् ।
त्यस्तै, प्रदेशसभा नियमावली संशोधन समितिले तयार पारेको प्रदेशसभा नियमावली २०७४ पहिलो संशोधन समितिका संयोजक रामेश्वर फुँयालले संसदमा पेश गरे । मूख्यमन्त्री डोरमणी पौडेलले प्रदेश लोकसेवा आयोगको गठन, काम, कर्तव्य, अधिकार र कार्यविधिका सम्बन्धमा व्यवस्था गर्न बनेको विधेयक र प्रदेश सवारी तथा यातायात व्यवस्था ऐन २०७५ लाई संशोधन गर्न बनेको विधेयक संसदमा प्रस्तुत गरे । 
त्यस्तै, आर्थिक मामिला तथा योजना मन्त्री कैलाश ढुंगेलको तर्फबाट आन्तरिक मामिला तथा कानूनी मन्त्री शालिकराम जम्कट्टेलले सार्वजनिक निजि सहकारी साझेदारी सम्बन्धी विधेयक संसदमा प्रस्तुत गरेका छन् । संसदको अर्को बैठक सोमबार विहान ११ बजे बस्नेछ ।