मदन भण्डारी स्वास्थ्य विज्ञान प्रतिष्ठान विधेयक पारित

१० भदौं, हेटौँडा । ३ नम्बर प्रदेशको प्रदेशसभा बैठकमा मदन भण्डारी स्वास्थ्य विज्ञान प्रतिष्ठान विधेयक सर्वसम्मत पारित भएको छ ।
सामाजिक विकासमन्त्री युवराज दुलालले पेश गरेको विधेयक संसदबाट सर्वसम्मत पारित भएको हो । विधेयकमाथिको छलफलमा भाग लिंदै सांसद दिपक निरौला लगायतले विधेयक नाम मदनकुमार भण्डारी भन्दा पनि मदन भण्डारी राख्दा राम्रो हुने धारणा प्रस्तुत गरेका थिए । समितिको प्रतिवेदनमा मदनकुमार भण्डारी भएकोमा मन्त्रीको स्विकृति अनुसार मदन भण्डारी स्वास्थ्य विज्ञान प्रतिष्ठान नामाकरण भई विधेयक पारित भएको थियो । 
यसक्रममा सांसद रमेश पौडेलले संसदबाट गलत नजिर बस्न लागेको भन्दै सभामुखको ध्यानाकर्षण गराएका थिए । उनले यातायात सम्बन्धी विधेयकमा यातायात समितिमा उपभोक्ताको प्रतिनिधिको संख्या बढाउन आफुले प्रस्ताव पेश गरेको र समितिमा समेत यसबारे सहमति भएपनि विधेयकमा नआएको बताउँदै विधेयक संसदमा पेश भएपछि प्रश्न उठाउँदा मूख्यमन्त्री डोरमणी पौडेलले समावेश गर्ने उल्लेख गरेको बताए । 
तर मूख्यमन्त्रीले सो कुरा विधेयकमा समावेश गर्ने रोष्टमबाट बताएपनि विधेयकमा उल्लेख नभएको तर मंगलबार मन्त्रीले स्विकृति जनाउने वित्तिकै संशोधन भएको भन्दै आपत्ति जनाएका थिए ।
बैठकमा प्रदेशसभा नियमावलीको पहिलो संशोधन समेत सर्वसम्मत पारित भएको छ । यसअघि विशेष समयमा सांसदहरुले आफ्नो क्षेत्रका समस्या, राजधानीको विषय र समसामयिक विषयमा धारणा राखेका थिए ।