भक्तपुर क्यान्सर अस्पतालमा मेयरको हस्तक्षेपको विरोध

१२ भदौ, हेटौँडा । भक्तपुरमा रहेको भक्तपुर क्यान्सर अस्पतालमा भक्तपुर नगरपालिकाका मेयर सुनिल प्रजापतिले गरेको हस्तक्षेपको प्रदेशसभामा विरोध भएको छ ।
मेयर प्रजापतिले अस्पताल व्यवस्थापन समिति हटाई आफु अध्यक्ष बनेर हस्तक्षेप गरेको भन्दै सांसदहरुले प्रदेशसभामा विरोध गरेका हुन् । 
भक्तपुरकै प्रदेशसभा सदस्य रजनी अमात्य जोन्छेले आफ्नो क्षेत्राधिकार नाघेर नेपाल अर्बुद्ध रोग निवारण संस्थाले संचालन गरेको अस्पतालमा मेयर प्रजापतिले हस्तक्षेप गरेको भन्दै विरोध गरेकी छिन् । उनले अस्पतालमा राजनीतिक हस्तक्षेपले विरामीहरुको सेवामा असर परेको भन्दै यथाशिघ्र यसबारे छानविन गरी सत्य तथ्य बाहिर ल्याउन प्रदेश सरकारको ध्यानाकर्षण गराएकी छिन् । 
त्यसैगरी, प्रदेशसभा सदस्य राधा घलेले भक्तपुर अस्पतालमा भईरहेको भक्तपुर नगरपालिकाको हस्तक्षेप गैरकानूनी भएको भन्दै यथाशिघ्र यसलाई अन्त्य गर्न माग गरेकी छिन् । उनले स्वायत्त निकायले संचालन गरिरहेको अस्पताल व्यवस्थापन समितिका अध्यक्ष लोकेन्द श्रेष्ठसहितलाई हटाई हस्तक्षेप गर्ने अधिकार मेयर प्रजापतिलाई नभएको दावि गरिन् । 
त्यस्तै, प्रदेशसभा सदसय शशीजंग थापाले अस्पतालमा भएको हस्तक्षेप निन्दनीय भएका भन्दै हस्तक्षेप नरोके भक्तपुर नगरपालिकालाई दिने प्रदेश सरकारको अनुदान बन्द गर्न समेत प्रदेश सरकारको ध्यानाकर्षण गराएका छन् । यसअघि प्रदेशसभा सदस्य नरोत्तम बैद्य, न्हुक्षेनारायण श्रेष्ठले पनि अस्पताललाई राजनीतिक स्वार्थ पुरा गर्न प्रयोग भईरहेको भन्दै यस्तो कार्य बन्द गराउन र सत्य तथ्य छानविनका लागि प्रदेश सरकारको ध्यानाकर्षण गराएका थिए । तर नेमकिपाको तर्फबाट भक्तपुरका प्रदेशसभा सदस्य सुरेन्द्रराज गोसाईले अस्पतालको नयाँ नेतृत्वप्रति जनता खुशी भएको भन्दै संसदमा धारणा राखेका थिए ।
आफ्नो परम्परागत बर्चश्वको क्षेत्र मान्ने नेमकिपाले आफ्नो पडक बाहिर रहेकाले अस्पतालमा राजनीतिक पूर्वाग्रह साँध्न हस्तक्षेप गरेको अरोप लागेको छ । आर्थिक हिनामिनाको आरोपमा भईरहेको समिति विघटन गरी नेतृत्व आफुले हत्याउन नेमाकिपाले कानून विपरित कदम चालेको आरोप नेपाल अबुद्र्ध रोग निवारण संस्थाको छ । नेमकिपाको मुखपत्र मजदुरमा हिनामिनाको समाचार प्रकाशन गरी नेमकिपाले नै हस्तक्षेप गर्नुले नेमकिपाको गलत मनासाय पुष्टि भएको संस्थाको भनाई छ ।
नयाँ समितिमा नेमकिपाका मेयर अध्यक्ष र सल्लाहकारमा नेमकिपाकै प्रतिनिधिसभा सांसद प्रेम सुवाल र प्रदेशसभाका सांसद सुरेन्द्रराज गोसाई मात्रै रहनुले यसलाई थप पुष्टि गरेको सांसदहरुको भनाई छ । सांसदहरुले नेमकिपाले विभिन्न बहानामा अस्पतालमा हुलहुज्जत गर्ने, जुलुस गराउने काम गरेको भन्दै यस्तो काम बन्द गराउन समेत माग गरेका छन् ।