२ विधेयक बहुमतले पारित, ३ विधेयक समितिमा

१२ भदौ, हेटौँडा । ३ नम्बर प्रदेशसभाबाट विहिबार दुई विधेयक बहुमतले पारित भएको छ । बैठकबाट प्रदेशसवारी तथा यातायात व्यवस्था ऐन २०७५ लाई संशोधन गर्न बनेको विधेयक र प्रदेशसभा सचिवालय सम्बन्धी ऐन संशोधन गर्न बनेको विधेयक बहुमतले पारित गरेको हो ।
बैठकमा मूख्यमन्त्री डोरमणी पौडेलले प्रदेश सवारी तथा यातात व्यवस्था ऐन २०७५ लाई संशोधन गर्न बनेको विधेयक प्रस्तुत गरेका थिए । विधेयक निर्णयार्थ पेश गर्दा विवेकशिल नेपाली दलका सांसद रमेश पौड्याल र विराजभक्त श्रेष्ठले विपक्ष रहेपछि विधेयक बहुमतले पारित भएको थियो । त्यस्तै, आन्तरिक मामिला तथा कानून मन्त्री शालिकराम जम्कट्टेलले प्रस्तुत गरेको प्रदेशसभा सचिवालय सम्बन्धमा व्यवस्था गर्न बनेको ऐन २०७५ लाई संशोधन गर्न बनेको विधेयक प्रस्तुत गरेका थिए । 
विधेयकको विपक्षमा विवेकशिल नेपाली दलका सांसदहरु रमेश पौड्याल, विराजभक्त श्रेष्ठ र राप्रपाकी सांसद रिता माझी रहेपछि विधेयक बहुमतले पारित भएको छ । सचिवालय सम्बन्धी विधेयकमा धारणा राख्दै प्रदेशसभा सदस्य विजया श्रेष्ठ केसी, रमेश पौड्याल, विराजभक्त श्रेष्ठ, रिना गुरुङले राजनैतिक नियुक्ति प्राप्त व्यक्तिलाई आर्थिक अधिकार दिन नहुने बताएका थिए । उनले प्रदेशसभामा सचिवको व्यवस्था गर्न माग गर्दै आर्थिक अनुशासन विपरित हुने काम नगर्न माग गरेका थिए ।
त्यस्तै, मूख्यमन्त्री डोरमणी पौडेलले पेश गरेको प्रदेश लोकसेवा सम्बन्धी विधेयक प्रदेश मामिला समिति, आर्थिक मामिला तथा योजना मन्त्री कैलाश ढुंगेलले पेश गरेको सार्वजनिक नीजि सहकारी साझेदारी सम्बन्धी विधेयक अर्थ तथा विकास समिति र उद्योग, पर्यटन, वन तथा वातावरण मन्त्री अरुण नेपालले पेश गरेको प्रादेशिक व्यापार तथा व्यवसाय सम्बन्धी विधेयक उद्योग, पर्यटन तथा वातावरण समितिमा पठाउने निर्णय सर्वसम्मत भएको छ ।
बैठक अर्को सूचना नभएसम्मका लागि स्थगित भएको छ ।