भिडियो कन्फ्रेन्स मात्रै गरेको हो, बैठक बसेको छैनः मन्त्री बाँस्कोटा

१२ भदौ, हेटौंडा । सञ्चार तथा सूचना प्रविधि मन्त्री गोकुल बाँस्कोटाले सिंगापुरमा उपचाररत प्रधानमन्त्री केपी शर्मा ओलीसंग भिडियो कन्फ्रेन्स मात्रै गरिएको तर क्याबिनेट बैठक नबसेको दावी गरेका छन् ।
प्रतिनिधिसभाको विहिबारको बैठकमा सार्वजनिक महत्वको विषयमा समय मागेर बोल्दै मन्त्री बाँस्कोटाले प्रधानमन्त्रीले मन्त्रीपरिषद्का सदस्यहरुसंग गरेको भिडियो कन्फ्रेन्समा ‘हाई हेल्लो’ मात्रै गरिएको तर मन्त्रीपरिषद्को बैठक नै चाहि नबसेको बताएका छन् ।
उनले हुदै नभएको विषयलाई अनावश्यक उचालेर मुलुकको सार्वभौम सत्तामाथि नै सरकारले गडबडी नै गरेको छ कि भन्ने रुपमा भ्रम फैलाउने काम भएको भन्दै असन्तुष्टी व्यक्त गरे ।
प्रतिपक्षी दल नेपाली कांग्रेसका सांसदहरुले उठाएको जिज्ञासाको जवाफ दिदै मन्त्री बाँस्कोटाले भविष्यमा गर्नुपर्यो भने गर्न सकिन्छ भनेर कार्यसम्पादन नियमावलि संसोधन गरिएकाले आवश्यक परे भिडियो कन्फ्रेन्स मार्फत क्याबिनेट पनि बस्न सक्ने स्पष्ट पारे । 
विदेशमा जहाजबाट नै मन्त्रीपरिषद्का बैठक हुने गरेको भन्दै भिडियो कन्फ्रेन्सलाई सुचना चुहियो र गोपनियता भंग भयो भनेर भन्न नमिल्ने मन्त्री बास्कोटाको तर्क थियो ।
सिंगापुरमा रहेका प्रधानमन्त्रीसंग भिडियो कन्फरेन्स बाट मन्त्रीपरिषद्को बैठक बसेको विषयलाई सत्तारुढ दलकै नेताहरुले पनि विरोध गर्दे आएका छन् ।