रेडियो मकवानपुरद्वारा जागरुक महिला सम्मान प्रदान

१३ भदौ, हेटौंडा । दिव्यतारा बहुउद्देश्यीय सहकारी संस्था लिमिटेडले सञ्चालन गरेको हेटौंडाकै पहिलो सामुदायिक रेडियो, रेडियो मकवानपुरले २ जना महिलालाई जागरुक महिला सम्मान प्रदान गरेको छ ।
नेपाली हिन्दु महिलाहरुको महान पर्व हरितालिका तीजको अवसर पारेर रेडियोले स्थापनाकालदेखि नै प्रदान गर्दै आएको जागरुक महिला सम्मान यस बर्ष पनि प्रदान गरेको हो ।
रेडियोले विहीबार तीज विशेष कार्यक्रमकाबीच रञ्जिता विक र सरिता लामालाई जनहि १० हजार नगद सहित सम्मान गरेको । 
सिलाई बुनाई व्यवसाय मार्फत स्वरोजगार भएको र सिलाई बुनाई तालिम पनि प्रदान गर्दै समाजमा महिलाहरुलाई आत्मनिर्भर बनाउन प्रेरित गरेको भन्दै लामालाई सम्मान गरिएको हो । यस्तै, सामाजिक कार्यमा योगदान दिएको भन्दै विकलाई सम्मान गरिएको हो । 
सम्मान कार्यक्रममा प्रमुख अतिथि संविधानसभा सदस्य एवम् कांग्रेस नेतृ आरजु देउवा राणाले समाज परिवर्तनको नेतृत्व महिला बाटै सम्भाव हुने दावी गरिन ।
दिव्यतारा सहकारीका अध्यक्ष महालक्ष्मी उपाध्याय डीनाको अध्यक्षतामा भएको कार्यक्रममा रेडियो सञ्चालक समितिका अध्यक्ष आनन्दराम पराजुली, रेडियोका स्टेशन म्यानेजर गणेशदर्पण अधिकारीलगायतले सम्मान प्रदान गरेका थिए । 
सम्मानसँगै तीज विशेष सांस्कृतिक कार्यक्रमको पनि आयोजना गरिएको थियो । कार्यक्रममा लक्की ज्वयलर्सले उत्कृष्ट नृत्य गर्ने र लक्की ड्र मार्फत विजेताहरुलाई पुरस्कार प्रदान गरेको थियो ।