दानबहादुर स्मृति जिल्ला लिग फुटबल प्रतियोगितामा सुरु

१९ भदौ, हेटौंडा । हेटौंडामा बुधबारबाट सुरु भएको दानबहादुर स्मृति जिल्ला लिग फुटबल प्रतियोगितामा साविक विजेता एफसी इन्टरनेट सिटी, सहीद स्मृति क्लव बागमति गाउँपालिका र मदन भण्डारी स्पोर्टस् एकेडेमीले विजय सुरुवात गरेका छन् ।
प्रतियोगिताको उद्घटनमा भएको पहिलो खेलमा साविक विजेता एफसी इन्टरनेटले परेली युवा समाज बस्तीपुरलाई ३–० ले हराएको छ । 
इन्टरनेटको जितका लागी मनिष घलानले दुई तथा चन्द्र नेगीले एक गोल गरे । दुई गोल गर्ने घलान खेलको म्यान अफ दी म्याच घोषित भए । 
यस्तै बुधबारनै भएको अर्को खेलमा सहीद स्मृति क्लव बागमति गाउँपालिकाले इन्टरनेट क्लवलाई २–० गोल अन्तरले हराएको छ । बागमतिको जितको लागी उत्कृष्ट प्रदर्शन गरेका रत्न मगर म्यान अफ द म्याच घोषित भए । 
यस्तै मदन भण्डारी स्पोर्टस् एकेडेमी र हेटौंडा फुटबल एकेडेमी विच भएको खेलमा मदन भण्डारी स्पोर्टस् एकेडेमी ४–० गोलको फराकिलो अन्तरले विजयी भएको छ । उसका लागी दुई गोल गरेका अविनास खड्का म्यान अफ दी म्याच घोषित भए । 
यस्तै बुधबारको चौथो खेल बराबरीमा टुङ्गिएको छ । बुधबार भएको चौथो खेलमा न्यू कम्बाइन्ड क्लवले र प्रगतिशील युवा क्लवले २–२ गोलको बराबरी खेलेका छन् । उक्त खेलको म्यान अफ दी म्याच प्रगतिशीलका बुद्ध लामा घोषित भए । 
भदौ १७ गते मंगलबारबाट सुरु हुने भनिएको प्रतियोगिता बर्षाको कारण अबरुद्ध भएपछि बुधबार बिहानबाट सुरु भएको हो । 
जिल्ला लिगका लागी दर्ता भएका ३३ वटा क्लबलाई ८ वटा समूहमा विभाजन गरी प्रतियोगिता सुरुभएको हो ।  लिगको विजेताले नगद १ लाख रुपैयाँ र उपविजेताले ५० हजार रुपैयाँ पुरस्कार प्राप्त गर्नेछन् ।