चनौटाको सार्वजनिक सुनुवाई तथा मिनी भेला

२१ भदौ, हेटौँडा । हेटौडा–१९ मा रहेको चनौटा सामुदायिक वन उपभोक्ता समूहको आयोजनामा शनिबार सार्वजनिक सुनुवाई तथा मिनि भेला सम्पन्न भएको छ । 
कार्यक्रममा हेटौडा–१९ का वडा अध्यक्ष नरनाथ सुवेदीले वनका कर्मचारीहरुको अनावश्यक हस्तक्षेप कारण सामुदायिक वनले सोचे अनुसारको प्रगति गर्न नसकेको आरोप लगाए । उनले जनप्रतिनिधिहरु निर्वाचित भएर आएपछि कर्मचारीहरु आत्तिएको र सामुदायिक वनलाई असहयोग गरेको बताए । वडा अध्यक्ष सुवेदीले बैज्ञानिक वन व्यवस्थापनको बहानामा सामुदायिक वन रित्याउने काम भएको दावि गरे ।
कार्यक्रममा समूहका कोषाध्यक्ष श्याम कुमार रिमालले आर्थिक वर्ष ०७५/०७६ को लेखापरीक्षण प्रतिवेदन र चालु आव ०७६/०७७ को लागि करिब २२ लाखको अनुमानित आयव्यय विवरण प्रस्तुत गरेका थिए । भेलाले आव ०७५/०७६ को लेखापरीक्षण प्रतिवेदन, चालु आव ०७६/०७७ को प्रस्तावित कार्यक्रम पारित गर्नुको साथै समुहको २१ औं वार्षिक साधारणसभा आगामी असोज ३० गते गर्ने निर्णय समेत गरेको छ । 
भेलामा सामुदायिक वन उपभोक्ता महासंघ, स्थानीय महासंघ हेटौडाका अध्यक्ष शम्भु प्रसाद न्यौपाने, संचारकर्मी भीमसेन पौडेल, समूहका सल्लाहकार शालिकराम अधिकारी, राजु घले, अनुगमन समितिका संयोजक रामकुमार थापा, पूर्व उपाध्यक्ष नारायणप्रसाद सुवेदी, शान्तिटोल विकास संस्थाका अध्यक्ष देवेन्द्र अर्याल, समितिका सहसचिव राजन ढकाल, सदस्य रिता थिङ लगायतले मन्तव्य व्यक्त गरेका थिए । 
समूहले आव ०७५/०७६ मा डिभिजन वन कार्यालय, राप्ती अन्तरगत सामुदायिक वन तर्फको तेश्रो पुरस्कार प्राप्त गरेको थियो । कार्यक्रम समूहका अध्यक्ष रामप्रसाद पौडेलको अध्यक्षतामा भएको थियो ।