मनहरीमा खुला फुबटल प्रतियोगिता हुने

२२ भदौ, हेटौंडा । मकवानपुरको मनहरी–७ मा खुला नकाउट फुटबल प्रतियोगिता सञ्चालन हुने भएको छ । चुरियामाई युवा क्लव मनहरी–७ को आयोजनामा बडा दशैंको अवसरमा यही असोज १ गतेबाट प्रतियोगिता हुन लागेको हो । 
मनहरी–७ स्थित प्रस्तावित क्षेत्रीय रंगशाला (गोदाम चौर)मा हुने प्रतियोगिताको तयारी तीव्र पारिएको आयोजकले जानकारी दिएको खबर हेटौंडाबाट प्रकाशित हुने प्रदेश दैनिकले छापेको छ । 
चुरियामाई क्लवले गत बर्षबाट खुला नकाउट फुटबल प्रतियोगिता आयोजना सुरु गरेको हो । प्रतियोगितालाई प्रत्येक बर्ष निरन्तरता दिने क्रममा यही असोज १ गतेबाट खेल सञ्चालन गर्न लागिएको आयोजक क्लवका अध्यक्ष श्रीकृष्ण राउतले जानकारी दिए । 
यस बर्ष पुरस्कार राशीमा समेत बृद्धि गरिएको छ । जिल्लाका करिब ३० क्लवले सहभागिता जनाउने अपेक्षा रहेको उनले बताए । यस बर्ष प्रतियोगिताको विजेताले नगद ५५ हजार ५ सय ५५ रुपैयाँ प्राप्त गर्नेछ भने उपविजेताले ३० हजार ३ सय ३३ रुपैयाँ प्राप्त गर्नेछ । 
प्रतियोगिता सञ्चालनको लागि करिब ४ लाख रुपैयाँ खर्च हुने आयोजकको अनुमान छ । खेलाडी उत्पादन, भाइचाराको विकास एवम् दशैंको शुभकामना आदानप्रदानको उद्देश्यले प्रतियोगिता आयोजना गर्न लागिएको आयोजक चुरियाई क्लवका सचिव रबिन्द्र खड्काले जानकारी दिए । 
प्रतियोगितामा सहभागी हुन चाहने क्लवले यही भदौ ३१ गते १० बजेसम्म टिम दर्ता गर्नुपर्ने र दर्ता शुल्क ४ हजार रुपैयाँ रहेको आयोजकले जानकारी दिएको छ ।  फोटोः गुगल