बजार अनुगमनका लागी दुईवटा उपसमिति गठन

२६ भदौ, हेटौंडा । नजिकिदै गरेका चाडबाडलाई मध्यनजर गर्दै बजार अनुगमनका लागी जिल्ला प्रशासन कार्यलय मकवानपुरको अगुवाईमा दुईवटा अनुगमन उपसमिति निर्माण गरिएको छ ।
प्रमुख जिल्ला अधिकारी प्रेमराज जोशीको अध्यक्षतामा विहिबार बसेको बैठकले यस्तो निर्णय गरेको हो । बैठकले खाद्य तथा गुण नियन्त्रण कार्यलय मकवानपुरको नेतृत्वमा खाद्य तथा खाद्य तथा खाद्य पदार्थ  र घरेलु तथा साना उद्योग कार्यलयको नेतृत्वमा गैर खाद्य पदार्थको अनुगमन गर्ने भएको छ ।
यसैगरी अनुगमनका क्रममा मूल्य बृद्धि, म्याद सकिएका सामाग्रीको विक्रि, न्युन गुणस्तरका सामान विक्रिवितरण लगाएतलाई विशेष निगरानीमा राखीने निर्णय भएको छ ।
बैठकले खाद्य तथा गुण नियन्त्रण कार्यलय मकवानपुरको नेतृत्वमा खाद्य तथा खाद्य पदार्थ अनुगमनका लागी जिल्ला प्रशासन कार्यलय, सम्बद्ध स्थानिय तह, भेटेनरी अस्पताल तथा पशु सेवा विज्ञ केन्द्र, पत्रकार महासंघ मकवानपुर, उपभोक्ता अधिकारवादी संस्था, मकवानपुर उद्योग वाणिज्य संघ, मकवानपुर होटल व्यवसायी संघ, र अवस्यकता अनुसार विषयगत निकायका प्रतिनिधि रहने गरी उपसमिति निर्माण गरेको छ ।
यस्तै गैर खाद्य पदार्थको अनुगमनका लागी घरेलु तथा साना उद्योग कार्यलयको नेतृत्वमा सम्बद्ध स्थानिय तह, जिल्ला प्रशासन कार्यलय, आन्तरिक राजश्व कार्यलय, जिल्ला स्वास्थ्य कार्यलय, पत्रकार महासंघ मकवानपुर, उपभोक्ता अधिकारवादी संस्था, मकवानपुर उद्योग वाणिज्य संघ, र अवस्यकता अनुसार विषयगत निकायका प्रतिनिधि रहेको उपसमिति निर्माण गरिएको छ ।
बैठकका क्रममा उभोक्तावादी संस्थाका प्रतिनिधिहरुले अनुगमन गर्ने मात्र नभई दोषीलाई कारबाहीको दायरमा पनि ल्याउनुपर्ने बताए । दोषीलाई कारबाही नगर्ने र सचेत मात्रै गराएर उन्मुक्ति दिने हो भने अनुगमनको कुनै औचित्य नहुने उनीहरुको भनाई थियो ।
प्रमुख जिल्ला अधिकारी जोशीले अनुगमनलाई प्रभावकारी बनाउँन सबैले सहयोग गर्नुपर्ने बताए ।  उनले चाँडबाडको मौकापारी उपभोक्ता ठग्न खोज्ने व्यपारीलाई कडा कारबाही गर्ने प्रतिवद्धता पनि व्यक्त गरे ।
बैठकमा साहायक प्रमुख जिल्ला अधिकारी चिरन्जिबी बस्नेत, जिल्ला प्रहरी कार्यालय मकवानपुरका एसपी मुकेशकुमार सिंह, १४ नम्बर गणका गणपती विकाश घिमिरे, उपभोक्ता हित संरक्षण मंचका केन्द्रीय उपाध्यक्ष अजय अधिकारी, उपभोक्ता मंच मकवानपुरका अध्यक्ष कुमार पौडेल, पत्रकार महासंघ मकावनपुरका उपाध्यिक्ष कुमार अधिकारी पोष्टराज, होटल व्यवसायी संघ मकवानपुरका अध्यक्ष शंकरलाल श्रेष्ठ, पुर्व अध्यक्ष भागिरथ शर्मा, खाद्य गुण प्राबिधिक नियन्त्रण कार्यालयकी अधिकृत श्रीजना महर्जन लगाएतको उपस्थिति रहेको थियो ।