पत्रकार उपचार कोषमा उपमहानगरको ४ लाख सहयोग

२७ भदौ, हेटौंडा । नेपाल पत्रकार महासंघ मकवानपुर शाखाले सञ्चालन गरेको पत्रकार उपचार कोषमा हेटौंडा उपमहानगरपालिकाले सहयोग रकम हस्तान्तरण गरेको छ । 
उपमहानगरपालिकाका प्रमुख हरिबहादुर महतले शुक्रबार उपचार कोषमा चार लाख रुपैयाँ हस्तान्तरण गरेका हुन् । प्रमुख महतले पत्रकार महासंघ मकवानपुरका अध्यक्ष हरि हुमागाँई, पत्रकार उपचार कोषका संयोजक तथा महासंघका उपाध्यक्ष सरिता दाहाल, उपाध्यक्ष कुमार अधिकारीलाई संयुक्त रुपमा चार लाख रुपैयाँको चेक हस्तान्तरण गरे ।
रकम हस्तान्तरण गर्दै प्रमुख महतले आगामी दिनमा पनि पत्रकारका लागि उपमहानगरको सहयोग निरन्तर रहने प्रतिवद्धता व्यक्त गरेका छन् ।
सहयोग रकम बुझ्दै नेपाल पत्रकार महासंघ मकवानपुरका अध्यक्ष हरि हुमागाईले उपचार कोषमा ९ लाख रुपैयाँ संकलन भएको जानकारी दिए । 
पत्रकार महासंघ मकवानपुरका अध्यक्ष हरी हुँमागाई र उपाध्यक्ष कुमार अधिकारी पोष्टराजले ५/५ हजार रुपैयाँ राखेर सुरु भएको पत्रकार उपचार कोषमा यसअघि उद्योग संघ मकवानपुरका अध्यक्ष नवराज अर्यालबाट दुई लाख र शिवम सिमेन्ट उद्योगबाट तीन लाख रुपैयाँ सहयोग प्राप्त भएको थियो ।
महासँघमा आबद्ध पत्रकार गम्भिर खालका बिरामी परेमा उपचार कोषको व्याज रकमबाट सहयोग गर्ने गरी कोषको स्थापना गरिएको अध्यक्ष हुँमागाईले जानकारी दिए ।
सहयोग रकम हस्तान्तरण कार्यक्रममा नेपाल पत्रकार महासंघ प्रदेश तीनका महासचिव कृष्ण सारुमगर, पुर्वअध्यक्ष कौसल पाण्डे, सचिव गणेश दर्पण अधिकारी, कोषाध्यक्ष सुदिप सिवाकोटी, ६ नम्बर वडाका अध्यक्ष अर्जुन चौलागाई लगायत विभिन्न संचार माध्यममा कार्यरत संचाकर्मीहरुको उपस्थिती रहेको थियो ।