हेटौंडा खानेपानी व्यवस्थापन बोर्डमा डिजिटल सूचना पाटी,पैसा ईसेवाबाट तिर्न सकिने

२७भदौ,हेटौंडा।हेटौंडा खानेपानी व्यवस्थापन बोर्डमा  डिजिटल  सूचना पाटीको उदघाटन गरिएको छ। बोर्डले शुक्रबार  पत्रकार सम्मेलनको आयोजना गर्दै डिजिटल सुचना पाटीको  सुरुवात गरेको हो।

हेटौडा उपमहानगरपालिकाका मेयर हरिबहादुर महतले डिजिटल सूचना पाटीको उदघाटन गरेका हुन।उदघाटन कार्यक्रममा बोल्दै प्रमुख महतले खानेपानी व्यवस्थापन बोर्डले सुरु गरेको डिजिटल सूचना पाटीले  सेवाग्राहीले सुविधा पाउने बताए।

उपभोक्ताले सहजै सूचना प्राप्त गरुन भन्ने उदेश्यले डिजिटल सूचना पाटीको व्यवस्था गरिएको हेटौंडा खानेपानी व्यवस्थापन बोर्डका अध्यक्ष प्रताप विष्टले जानकारी दिएका छन्।अध्यक्ष बिष्टले हेटौंडा खानेपानी व्यवस्थापन बोर्डले हेटौंडा नगरका उपभोक्तालाई  सूचना पाटीबाट बोर्डका गतिविधि, आम्दानी, खर्च तथा बचतका बारेमा सहजै जानकारी होस भन्ने उद्देश्यले डिजिटल सूचना पाटीको सुभारम्भ गरिएको बताए। उनले‌ अघिल्लो महिनाको बोर्डले गरेको गतिविधि, आम्दानी खर्च  महिनाको १० गते भित्र डिजिटल सूचना पाटी मार्फत जानकारी लिन सक्ने भन्दै अब ग्राहकले  खानेपानी महशुल इसेवाबाटै भुक्तानी गर्न सकिने बताए‌ ।

पत्रकार सम्मेलनमा हेटौंडा खानेपानी व्यवस्थापन बोर्डका निमित्त कार्यकारी निर्देशक सुदर्शन ढकालले आर्थिक वर्ष २०७५/७६ को प्रगती विवरण तथा आर्थिक वर्ष ७६/७७ को नीति, कार्यक्रम तथा बजेट प्रस्तुत गरेका थिए। त्यसैगरी हेटौडा खानेपानी व्यवस्थापन बोर्डले खानेपानीको पाइप लाइन मर्मतकस रात्री कालिन सेवा आरम्भ गरेको जनाएको छ।

कार्यक्रममा मकवानपुर उद्योग वाणिज्य संघका अध्यक्ष कृष्ण कटुवाल, खानेपानी तथा सरसफाई डिभिजन कार्यालयका इन्जिनियर हरी प्रसाद पराजुली, बोर्डका सदस्य इन्द्र प्रसाद नेपाल, नेपाल पत्रकार महासंघ प्रदेश तीनका महासचिव कृष्ण सारुमगर, पत्रकार महासंघ मकवानपुरका अध्यक्ष हरी हुमागाई,इसेवाका प्रतिनिधी विक्रम मोक्तान लगायतको सहभागिता रहेको थियो।