दिव्यज्योतिमा ४३ विद्यार्थी, बढाउने सबैको प्रतिवद्धता

२ असोज हेटौडा । हेटौडा–१७ चुच्चेखोलामा रहेको दिव्यज्योति आधारभूत विद्यालयमा ४३ जना विद्यार्थीहरु अध्ययन गर्दै आएका छन् । विद्यालयको विहिवार भएको ४६ औं अभिभावक भेलामा आफनो प्रतिवेदन प्रस्तुत गर्दै प्रधानाध्यापक प्रमिला घिमिरेले विद्यालयमा कक्षा ५ सम्म ४३ जना विद्यार्थीहरु अध्ययनरत रहेको उल्लेख गरेकी हुन । अभिभावकहरुले अपनत्व नगरेको, स्थानीयले बेवास्ता गरेको, स्थानीय तहले सोचे अनुसारको सहयोग नगरेको लगायतका कारणले विद्यार्थी संख्या न्युन भएको प्रअ घिमिरेको प्रतिवेदन भनिएको छ । 
विद्यार्थी संख्या कम हुँदा ६ देखि ८ सम्म पठनपाठन हुँदै आएको विद्यालय ५ सम्म झरेको भन्दै कार्यक्रममा सहभागीहरुले सबैले सहयोग गरेर विद्यार्थी संख्या बढाउने प्रतिवद्धता व्यक्त गरेका थिए । उनीहरुले विद्यालयको भौतिक र शैक्षिक गणस्तर सुधार गर्दै विद्यार्थी बढाउन आफुहरुको तर्फबाट सहयोग रहने प्रतिवद्धता व्यक्त गरेका थिए । प्रदेश सभा सदस्य मुनु सिग्देलको प्रमुख आतिथ्यता एवम विद्यालय व्यवस्थापन समितिका अध्यक्ष रोशन घिमिरेको सभाध्यक्षतामा भेला भएको थियो । 
भेलामा हेटौडा–६ का वडा अध्यक्ष अर्जुन प्रसाद चौलागाई, १७ का वडा अध्यक्ष भैरब बहादुर राई, विद्यालयका संस्थापक प्रअ. हरि प्रसाद सिग्देल, चुच्चेखोला सामुदायिक वनका अध्यक्ष अर्जुनप्रसाद दाहाल, लायन्स शम्भु नकर्मी, सम्राट तुम्वा हाम्फे, टासी तुम्वा हाम्फे, दिव्यनगर टोल विकास संस्थाका अध्यक्ष प्रमेश पराजुली, प्रगतिशिल युवा क्लवका अध्यक्ष प्रविण गौतम, युवा व्यवसायी नवराज न्यौपाने, मोर्डन ईस्फाक्टचरका मेनेजर उदय विडारी, शिक्षक शालिकराम घिमिरे, सानुकाजी पाण्डे, नवराज पौडेल, पुरुषोत्तम शर्मा लगायतकाले मन्तव्य व्यक्त गरेका थिए । 
कार्यक्रममा विद्यालय सुधारका निमित्त हेटौडा–४ निवासी संजय सिग्देलले २५ हजार, हेटौडा–१७ बस्ने युवा व्यवसायी नवराज न्यौपानेले २५ हजार र हेटौडा–१७ बस्ने समाजसेवी उदय विडारीले भौतिक संरचना बनाउनका लागि ढुंगा, गिटी र बालुवा ढुवानी गराउने प्रतिवद्धता जनाएका थिए ।